धरानः धरानको नजिक भेडेटार जाने बाटोमा गुडिरहेको एउटा कारमा आगलागी भएको छ ।
भेडेटारमुनि कोशी राजमार्र्गमा गुडिरहेको भारतीय नम्बर प्लेटको कारमा शुक्रबार दिउँसो आगलागी भएको हो ।
आगलागीमा कार जलेर नष्ट भएको छ । आँपगाछीभन्दा करिब सय मिटर माथि भारतीय नम्बर प्लेट बिआर११ यु ४०४७ नम्बरको कारमा आगलागी भएको जिल्ला ट्राफिक कार्यालय सुनसरीले जनाएको छ ।
भारतको बिहारबाट घुम्न भएका पर्यटकको कार जलेर नष्ट भएको प्रहरीले जनाएको छ । विहार राज्यस्थित जोगवनीका ३५ वर्षीय राजीव सिंहले चलाएको कारमा सवार ५ जना पर्यटक रहेका थिए । उनीहरु सकुशल रहेको प्रहरीले जनाएको छ । विद्युत सर्ट भएर आगलागी भएको हुनसक्ने प्रहरीले जनाएको छ ।
आगलागीका कारण केहीबेर यातायात आवागमन ठप्प भएको थियो । धरान उपमहानगरपालिकाको दमकल आगो नियन्त्रणमा लिएको थियो ।