धरानः धरानमा धरान उपमहानगरपालिकाका गणकमाथि प्रहार भएको गोली प्रहरीले भेटेको छ ।
इलाका प्रहरी कार्यालय धरानका डिएसपी बुद्ध श्रेष्ठका अनुसार धरान उपमहानगरपालिकाको गरिबी निवारणको गणकको रुपमा कार्यरत् यहासु राई चढेको मोटरसाइकलमा लागेको गोली प्रहरीले फेला पारेको जानकारी दिए । ‘एसएलआरको गोलीजस्तो देखिने गोली नै मोटरसाइकलको ट्याङ्कीमै फेला पारेका छौं’, उनले भने, ‘यस विषयमा थप अनुसन्धान भइरहेको छ ।’
धरान–११ र २० जोड्ने पुल केही माथि धरान-२० विष्णुपादुका जाने बाटो (पिच रोड सकिनेवित्तिकै) मा अज्ञात व्यक्तिले गोली प्रहार गरेको थियो । गोली लागेर मोटरसाइकलको ट्याङ्कीमा गोली छिरेको पाइएको प्रहरीले जनाएको छ । मोटरसाइकलमा हिँडिरहेका राईमाथि गोली चलाइएको हुनसक्ने प्रहरीको अनुमान छ । ‘लुटपाटमा संलग्न व्यक्तिले उनीमाथि नै गोली प्रहार भएको हुनसक्छ’, प्रहरी स्रोत भन्छ ।
‘मोटरसाइकलमा गोली लागेर मोटरसाइकलको ट्याङ्कीमा दुलो परेको पाइएको थियो, गोली खोज्दै जाँदा मोटरसाइकलकै ट्याङ्कीभित्र भेटियो,’ इलाका प्रहरी कार्यालय धरानका इन्स्पेक्टर गजेन्द्र रायामझीले भने । घर फर्किँदै गर्दा गोली प्रहार भएको र सो गोलीले राई चढेको मोटरसाइकलमा गोली लागेको थियो । नीमाथि कसले र किन गोली चलाएको हो भन्नेबारेमा अहिलेसम्म खुलिनसकेको प्रहरीले जनाएको छ ।
सडकमा मोटरसाइकल चलाइरहँदा सडक किनारमा उभिएका एक व्यक्तिले आफूलाई पेस्तोलजस्तो वस्तुले ताकिरहेको देखेको र त्यो देख्नेवित्तिकै आफू मोटरसाइकल हुइँक्याउँदै गर्दा गोली प्रहार भएको राईले जानकारी दिए । उनका अनुसार बन्दुक पडकिएजस्तो आवाज आएपछि आफूले झनै तीब्र गतिमा मोटरसाइकल हुइँक्याएर गाउँले र प्रहरी गुहारेको थिएँ । ‘आफूमाथि नै गोली लागेछ भनेर तीब्र गतिमा मोटरसाइकल हुइँक्याउँदै माथि पुगेपछि मोटरसाइकलबाट तेल चुहिएको देखें’, राईले भने, ‘त्यसपछि स्थानीय र प्रहरीलाई खबर गरें ।’
धरान-२० का वडाध्यक्ष पदमबहादुर लिम्बूले अहिले धरान-२० बासी त्रसित बनेको बताए । उनले इलाका प्रहरी कार्यालयमा जाहुरी दिएको बताए । शुक्रबार राति करिब ८ बजेतिर सो घटना भएको प्रहरीले जनाएको छ ।