धरानः सियोन स्कुलको आयोजनामा शुक्रबार आयोजित एक दिने सियोन स्कुल थ्री वाइ थ्री महिला पुरुष बास्केटबल प्रतियोगिताको दुवै उपाधि होलिल्याण्ड स्कुलले चुमेको छ ।
छात्रातर्फको फाइनल खेलमा होलिल्याण्डले आयोजक सियोन स्कुललाई १२–१ र छात्रतर्फ डिपो स्कुललाई ९–७ अंकको अन्तरले पराजित गर्दै उपाधिमाथि कव्जा जमाएको हो । अत्यन्त प्रतिस्पर्धात्मक भएको छात्रतर्फको खेलमा भने निर्धारित समय सकिँदा दुवै टिमले बराबर ७–७ अंक जोडेपछि समय थप गरिएको थियो । थप समयमा होलिल्याण्डले दुई पोइन्ट जोड्दै ९–७ अंकको नतिजा ल्याउँदै होलिल्याण्ड विजयी भएको थियो ।
उपाधिसँगै बिजेता होलिल्याण्ड स्कुलका छात्रा छात्र दुवै टिमले नगद चार हजार रुपैयाँ, ट्रफी, मेडल र प्रमाणपत्र प्राप्त गरेका छन् । उपविजेता छात्रातर्फका सियोन स्कुल र छात्रतर्फका डिपो स्कुलले नगद दुई हजार रुपैयाँ, ट्रफ्री, मेडल र प्रमाणपत्र प्राप्त गरे । प्रतियोगिताको उत्कृष्ट खेलाडीको उपाधिमाथि पनि दुवैतर्फ होलिल्याण्ड स्कुलले नै कब्जा जमाएको छ । छात्रतर्फ युडी लिम्बू र छात्रातर्फ सन्ध्या राई उत्कृष्ट खेलाडी घोषित भए ।
त्यस्तै, उदयीमान खेलाडीमा छात्रा छात्र दुवैतर्फ आयोजक सियोन स्कुलका सम्झना राई र संयोग राई घोषित भए । उनीहरुलाई जनही नगद एक हजार रुपैयाँ, ट्रफी र प्रमाणपत्र प्रदान गरिएको थियो । विजेता तथा उपविजेता खेलाडीहरुलाई कार्यक्रमका प्रमुख अतिथि धरान १६ नं वडाका वडाध्यक्ष मुरारी भट्टराई, सियोन स्कुलका अध्यक्ष खड्गबहादुर थापा मगर, प्रदेश १ बास्केटबलका मुख्य प्रशिक्षक विकास चाम्लिङ राई, मुवाथाइ किक बक्सिङका सुनसरी अध्यक्ष एलकोन मगरलगायतले पुरस्कार वितरण गरेका थिए ।
प्रतियोगिताको सेमिफाइनलमा छात्रातर्फ सियोन स्कुलले चिल्ड्रेन स्कुललाई र होलिल्याण्ड ए ले होलिल्याण्ड बि टिमलाई पराजित गर्दै फाइनल प्रवेश गरेको थियो । त्यस्तै, छात्रतर्फ डिपो स्कुलले आयोजक सियोन स्कुल र होलिल्याण्ड स्कुलले तरहरा ए टिमलाई पराजित गर्दै फाइनल प्रवेश गरेको थियो । प्रतियोगितामा यसैवर्ष एसइई दिएका विद्यार्थीसम्मका पुरुषतर्फ १२ टिम र महिलातर्फ ५ टिमले सहभागिता जनाएका थिए ।