धरानः धरानका एक छात्रले अन्तर्राष्ट्रिय प्रतियोगितामा स्वर्णपदक जितेका छन् ।
धरान–१६ स्थित नवोदय विद्या मन्दिर स्कुलको कक्षा–६ मा अध्ययनरत छात्र प्रमोद राईले अन्तर्राष्ट्रिय कराँते प्रतियोगितामा स्वर्णपदक जितेका हुन् ।
भारतको कलकत्तामा सम्पन्न छैटौं अन्तर्राष्ट्रिय कराँते च्याम्पियनसीप २०२२ प्रतियोगितामा नेपालको तर्फबाट गोल्ड मेडल (स्वर्ण पदक) प्राप्त गर्न सफल भएका हुन् ।
पर्वत राईका छोरा प्रमोदले नेपालको तर्फबाट प्रतिनिधित्व गर्दै गोल्ड मेडल प्राप्त गर्न सफल बनेका हुन् । ‘जे होस् नवोदय पढ्ने छात्रले अन्तर्राष्ट्रियस्तरको प्रतियोगितामा सहभागी भएर विद्यालय तथा देशकै नाम अन्तर्राष्ट्रिय जगतमा राख्न सफल भएका छन्’, प्रिन्सिपल डम्बरकुमार तुम्बापोले भने ।
सहायक प्रिन्सिपल विद्याभुषण गुप्ताका अनुसार छात्र प्रमोद पढाइका साथै अतिरिक्त क्रियाकलापमा पनि अगाडि रहेका छन् । उनका अनुसार छात्र प्रमोदले बंगलादेशमा आयोजना हुने प्रतियोगितामा पनि भाग लिनेछन् ।