धरान मेघा हिमालयन कलेजमा विद्यार्थीको क्रेज बढ्दो छ । केहीदिनअघि लिइएको प्रवेश परीक्षामा धरानलगायत अन्य जिल्लाबाट करिब ५ सय ५० विद्यार्थीले सहभागिता जनाएका थिए । कलेजका प्रिन्सिपल भाष्कर पौडेलसँग गरिएको कुराकानी
यहाँ कुन कुन विषय पठनपाठन हुने गरेको छ ?
–हामीले साइन्स, म्यानेजमेण्ट, होटल म्यानेजमेण्ट, कम्प्युटर साइन्स, फुड एण्ड न्युट्रीसनको पठनपाठन गराउँदै आएका छौं । विशेषतः साइन्सलाई नै फोकस गरेर अत्याधुनिक प्रकारको साइन्स ल्याब पनि निर्माण गरेका छौं भने होटल म्यानेजमेण्टलाई पनि फोकस गरेर प्रदेश १ मै स्तरीय प्राक्टिकल ल्याब तयार गरेका छौं ।
विद्यार्थी चासो दिइरहेका छन् ?
–अवश्य पनि चासो दिइरहेका छन् । भर्ना खुल्यो भनेर जानकारी दिँदादेखि नै विद्यार्थीको चाप बढ्दै गएको पाइएको छ ।
विशेषतः कुन विषयमा विद्यार्थीको रुचि बढेको पाइयो ?
–विशेषतः फुड एण्ड न्युट्रीसन, साइन्स, होटल म्यानेजमेण्ट विषयमा चासो बढेको छ । यी विषय रोजगारीसँगै जोडिएकोले पनि विद्यार्थीको चासो बढेको हुनसक्छ ।
कलेजमा फरक के छ ?
–हामीले विद्यार्थीको रुचि र चासो अनुसार ध्यान दिने कोसिस गरिरहेका छौं । मानौं, कोही विद्यार्थी साइन्स पढेर डाक्टर, इन्जिनियर बन्न चाहन्छन् । उनीहरुले तयारी कक्षाको ‘फेस’ गर्नुपर्ने हुन्छ । हामीले त्यसको लागि कक्षा–११ को बीच कक्षादेखि नै तयारी कक्षा सञ्चालन गर्दैछौं । यस्तै, पूर्वमै अत्याधुनिक विज्ञान प्रयोगशाला, होटल म्यानेजमेण्टको स्तरीय ल्याब, लाइब्रेरी, होस्टल, खेलकुद आदिमा जोड दिँदै आएका छौं । हामीले किताबको पढाइ मात्रै होइन बाहिरी ज्ञान पनि दिने कोसिस गरेका छौं । यहाँ विद्यार्थीलाई रमाइलोका साथ पढाउने कोसिस गरिरहेका छौं ।
धेरैजनाको लगानी छ भन्ने सुनिन्छ नि ।
–हो, यस कलेजमा धरानका धेरैजना शिक्षा सम्बन्धित व्यक्तित्वहरुको लगानी छ । मेघा प्रोजेक्टकै रुपमा मेघा कलेजको स्थापना गरेका हौं ।
धरानलाई शैक्षिक हब बनाउन सकिन्छ ?
–आजभन्दा २०–३० वर्षअघि विराटनगरमा विद्यार्थी धरान पढ्न आउँथे । म र हाम्रा साथीहरु पनि पढ्नका लागि धरान जाने है भन्ने हुन्थ्यो । हुन पनि हो यहाँ, इञ्जिनियरिङ कलेज छ, संस्कृत क्याम्पस छ, विज्ञानका लागि हात्तिसार क्याम्पस छ, यस्तै, महेन्द्र कलेज, बीपी प्रतिष्ठानमा डाक्टर, नर्स उत्पादन हुँदै आएका छन् । त्यतिबेला धरान एउटा शैक्षिक हबजस्तै बनिसकेको थियो । त्यो साख र चार्म अहिले हराउँदै गएको आभाष हुन थालेको छ ।
तर राजनीतिक वा अन्य कारणले पनि यहाँ शैक्षिक हब बन्न नसकेको हो कि जस्तो लाग्छ । अब शैक्षिक हब बनाउन के कमजोरी छन् आदि इत्यादि खोज्नुपर्ने भएको छ । हामी शिक्षाविदकै पनि कमजोरी छ कि, राजनीतिक अवस्थाले पनि यस्तो गरायो कि, अभिभावकवर्गको कमजोरी हो खोजिनुपर्छ, केलाइनुपर्छ भन्न चाहन्छु ।
धरानमा दिग्गज शैक्षिक व्यक्तित्वहरु हुनुहुन्छ । उहाँहरुको पहल हुने हो भने साँच्चै धरान शैक्षिक हब बन्न सक्छ । यस्तै, धरानका स्वच्छ प्रतिस्पर्धा राख्दै शिक्षा क्षेत्रका व्यक्तित्वहरु लाग्ने हो भने धरान शैक्षिक हब बन्न केही बेर लाग्दैन ।
विद्यार्थी अझै काठमाडौं पुग्नुपर्ने ?
–मैले पनि काठमाडौंमा केही वर्ष पढाएँ । मेरो अनुभवले भन्छ– धरानमै सबै सेवा–सुविधा देख्छु । अब विद्यार्थी काठमाडौं गइरहनु पर्छजस्तो लाग्दैन । बाबुआमाको मायाबाट टाढा रहँदा काठमाडौंमा विद्यार्थी पुग्दा बिग्रिने समेत हुन्छ ।
विद्यार्थीका लागि के छ सुविधा ?
–हामीले पैसा तिर्ने विद्यार्थी मात्रै होइन कि विविधता भएको विद्यार्थी लिन्छौं । हामीले तीन क्याटोगोरीमा छात्रवृत्तिको व्यवस्था गरेका छौं । विद्यार्थीको शैक्षिक अवस्था, आर्थिक अवस्था र अतिरिक्त क्रियाकलापमा अब्बल विद्यार्थीलाई छात्रवृत्तिमा समावेश गरेका छौं । जेहेन्दार, मिहिनेती र अब्बल विद्यार्थीलाई निःशुल्कदेखि २५, ५० र ७५ प्रतिशतसम्म छुट दिएका छौं ।
कलेजका विशेषता के के छन् ?
–दक्ष र अनुभवी शिक्षक–शिक्षिकाहरूबाट गुणस्तरीय शिक्षा प्रदान गर्ने हाम्रो ध्येय हो । नतिजा राम्रो भयो भने कलेजको भविष्य पनि राम्रो हुन्छ भन्ने हामीले सोंचेका छौं । कलेजको पठनविधि व्यावहारिक र प्रयोगात्मक हुन्छ । यस्तो पठन विधिले विद्यार्थीको ज्ञान, सीप र क्षमता विकासमा ठूलो सहयोग पुरयाउँछ । अर्थात् विद्यार्थीको नतिजा रिजल्टमा आउने उत्कृष्ट नम्बरमा मात्रै सीमित नराखी उनीहरूको दैनन्दिनमा प्रयोगमा आउने संस्कार, बोली वचन, बजारमा प्रस्तुत हुँदा उनीहरूमा विकसित आत्मनिर्भरता र नेतृत्वदायी भूमिकामा समेत विद्यार्थीलाई उजागर गर्दै लैजाने खालको अध्ययन शैली कलेजले अवलम्वन गर्नेछ । कलेजले जीवनकै परीक्षा सफल बनाउने रोडम्याम समेत तयार गर्न विद्यार्थीलाई मद्दत गरिदिन्छ ।
कलेजमा फिजिक्स, बायोलाजी, केमेस्ट्री, कम्युटर साइन्स लगायतका छुट्टाछुट्टै र बृहत्त ल्याबहरू छन् भने होटल व्यवस्थापन विषय पढ्ने र पर्यटन विषय पढ्ने विद्यार्थीहरूका लागि सोही अनुरूपको प्रयोगात्मक सीप उपलब्ध रहेको छ ।
अध्ययन अध्यापनका साथसाथै यस कलेजले विद्यार्थीलाई विभिन्न अध्ययन भ्रमण, प्रोजेक्ट वर्क, गोष्ठी लगायत अतिरिक्त क्रियाकलापबाट विद्यार्थीको क्षमता विकास गराउन प्रेरित गर्नेछ ।
बास्केटबल, भलिबल, फुटसलमा विद्यार्थीलाई जोड दिइनेछ । त्यतिमात्र होइन हाजिरीजवाफ प्रतियोगिता, वक्तृत्वकला प्रतियोगिता आदिमा विद्यार्थीलाई गतिशील गराइनेछ । खेलकुदले विद्यार्थीलाई अनुशासित, स्वस्थ र गतिशिल बनाउने कलेजको बुझाइ छ ।
भर्ना भएका विद्यार्थीलाई निश्चित उद्देश्यमा पुरयाउने गरी पठनपाठनका गतिविधिमा तथा अन्य विविध अतिरिक्त क्रियाकलापमा लगाउने हुनाले प्रत्येक वर्ष विद्यार्थी, अभिभावकले मन जित्न सकुन् । अर्थात् कलेजले भने बमोजिमका गतिविधि गर्नमा पनि कुनै कमी राख्दैन ।
साथमा कलेजका अध्यक्ष कैलाश लिम्बू, बिबिएस, म्यानेजमेण्ट कोअर्डिनेटर चन्द्र वनेम लिम्बू, एचएमका हेड अफ डिपार्टमेण्ट अफ पोषण श्रेष्ठसँगको कुराकानी भिडियोमा :