धरानः धरान–१२ स्थित धरान मेघा हिमालयन कलेजमा एक करोड रुपैयाँ बढीको लगानीमा प्राक्टिकल ल्याब स्थापना भएको छ ।
कलेजका अध्यक्ष कैलाश लिम्बूका अनुसार होटल म्यानेजमेण्ट पढ्ने विद्यार्थीका लागि प्रदेश १ मै उत्कृष्ट प्राक्टिकल ल्याब स्थापना गरिएको छ । ‘हामीले करोड बढीको लगानीमा ल्याब स्थापना गरेका छौं’, उनले भने, ‘यो सम्भवतः प्रदेश १ मै उत्कृष्ट हो ।’
फ्रन्ट अफिस, फुड प्रोडक्सन, फुड सर्भिसेस, हाउस किपिङ अप्रेसन, होटल एकाउन्ट, हस्पिटालिटी आदिका लागि ल्याब निर्माण गरिएको एचएमका हेडअफ डिपार्टमेन्ट पोषण श्रेष्ठले जानकारी दिए ।
भौतिक पूर्वाधारका कारण पनि विद्यार्थी अभिभावकको मन जित्न सकिने हुनाले करोड बढीको लगानीमा यस्तो ल्याब स्थापना गरिएको बिबिएस, म्यानेजमेण्ट कोअर्डिनेटर चन्द्र वनेम लिम्बूले जानकारी दिए । ‘कलेजमा विद्यार्थीहरू भौतिक पूर्वाधारप्रति आकर्षित भएर समेत आउने गर्दछन्’, उनले थपे, ‘यसको लागि अभिभावकको समेत विश्वास रहन्छ ।’
यस्तै, कलेजमा अत्याधुनिक र पूर्वाञ्चलको नमूना विज्ञान प्रयोगशाला सञ्चालनमा ल्याएको उनले जानकारी दिए । ‘अन्य कलेज पनि घुम्यौं’, उनले भने, ‘ती कलेजको भन्दा फरक तरिका र पूर्वाञ्चलकै नमूना प्रयोगशाला बनाएका छौं ।’ उनले विज्ञान प्रयोगशालासँगै कम्प्युटर ल्याब पनि एसीसहितको सुविधा भएको सञ्चालनमा ल्याएको जानकारी दिए ।
प्रिन्सिपल भाष्कर पौडेलले धरान मेघा कलेजले आफ्नो अलग्गै पहिचान बनाउन सफल भएसँगै गुणस्तरीय शिक्षालाई जोड दिँदै प्रयोगात्मक विधिलाई पनि विश्वासयोग्य बनाइने बताए ।
दक्ष र अनुभवी शिक्षकहरुबाट अध्यापन हुने कलेजमा पछिल्लो समय विद्यार्थी र अभिभावकको समेत पहिलो रोजाई बनेको उनले दावी गरे । ‘पहिलो पटकको प्रवेश परीक्षामै ५ सय ५० बढी विद्यार्थी सहभागी थिए, अहिले पनि हामीले धमाधम भर्ना कार्यक्रम सञ्चालन गरिरहेका छौं’, उनले भने ।
उनले विषयवस्तुसँग सम्बन्धित विशेषज्ञहरुद्धारा पनि अध्यापन गराइने कलेजका अध्यक्ष लिम्बू बताउँछन् । उनले भने,‘हाम्रो कलेजमा मल्टिमिडिया पद्दतिबाट अध्यापन हुन्छ । अनुभवी प्राध्यापकहरु छन्, फरक शैली छ । विषयसँग विज्ञहरु आमन्त्रण गरेर कक्षा चलाउँछौं । यसले विद्यार्थीहरुको वृहत्तर विकासमा टेवा पुग्छ ।’
सहुलियत शुल्कमा अध्ययन अध्यापन हुने कलेजमा बस र होस्टलको पनि सुविधा छ । प्लस टु र जिल्ला प्रथम हुने विद्यार्थीहरुलाई शत प्रतिशत छात्रवृत्ति उपलब्ध गराइरहेको उनले बताए । ‘कलेजको सुविधाजनक आफ्नै भवन छ । खेलकुद, सांगीतिक, नृत्य, उदघोषक, साहित्य, साँस्कृतिक कलाहरुमा प्राथमकिता दिइन्छ,’उनले भने, ,‘सामाजिक गतिविधिहरुमा पनि सहभागिता गराउँछौं । यस्ता अतिरिक्त गतिविधिहरुबाट विद्यार्थीहरुको सर्वाङ्गीण व्यक्तित्वको विकास हुन्छ ।’ कलेजको आफ्नै ४ तले भवन छ । पर्याप्त खेलकुद मैदान छ भने हाल अत्याधुनिक बास्केटबल कोर्ट निर्माण भएको छ । त्यहाँ भलिबल र ब्याडमिन्टन पनि खेल्न सकिने कलेजको भनाई छ ।