धरानः कोरोनाको प्रकोपबाट दुई वर्ष रोकिएको धरानको बोलबम मेलामा साउनको अन्तिम सोमबार लाखौ भक्तजनको सहभागितासहित समापन भएको छ ।
दुईवर्ष रोकिएको श्रीपिण्डेश्वर बाबाधाममा लाग्ने बोलबम मेला यस वर्ष पाँचवटा सोमबार परेको थियो । यसवर्षको श्रावणमा विभिन्न चाडवाडसमेत परेकोले महिनाभरि नै भक्तजनको घुँइचो लागेको थियो ।
श्रावण भगवान शिवजीको प्रिय महिना र सोमबार प्रिय बार भएकोले यी दिनमा शिवजीको आराधना गर्नाले भगवान खुसी हुने र शिव कृपा प्राप्त हुने विश्वास गरिन्छ । यसै विश्वासका कारण श्रावणको सोमबार विभिन्न शिवालयमा भक्तजनहरूको ठूलो भिड हुने र आराधना गर्ने हुन्छ ।
४० वर्ष पहिलेबाट धरानको श्री पिण्डेश्वरमा चतराको कोशीबाट जल ल्याएर चढाउने बोलबम मेलाको परम्परा चलिआएको छ । यसवर्ष प्रदेश एक र मधेस प्रदेशबाट करिब १० लाख भक्तजनले पिण्डेश्वरमा जल चढाएको श्रीपिण्डेश्वर बाबाधाम समितिका अध्यक्ष विकास बनेपालीले बताए । उनका अनुसार यसवर्ष बोलबम मेलाको प्रचार प्रसार मधेस प्रदेसका ८ वटै जिल्लामा समेत गरिएको थियो ।
पिण्डेश्वर बोलबम मेलामा विशेषतः शनिबार आइतबार, सोमबार र मङ्गलबार यसपटकदेखि भक्तजन लगातार आएका थिए । पछिल्ला दुई सप्ताहका शनिबार आइतबार र सोमबार साँझमा विशेष आरती समेत गरिएको थियो । गंगा आरतीको झल्को देखिने विशेष आरतीमा भक्तजनको भव्य श्रद्धा देखिएको थियो ।