धरानः धरान उपमहानगरपालिकाद्वारा साइक्लिङ प्रतियोगिता आयोजना भएको छ ।
अन्तर्राष्ट्रिय मानव बेचबिखनविरुद्धको दिवसको अवसरमा धरान उपमहानगरपालिका शिक्षा युवा तथा खेलकुद महाशाखाको आयोजना तथा सुनसरी साइक्लिङ सङ्घको संयोजनमा सो प्रतियोगिता भएको हो ।
प्रतियोगिताको उद्घाटन धरान उपमहानगरपालिकाका मेयर हर्कराज राई साम्पाङले रविन काटेर गरेका छन् । कार्यक्रममा मेयर साम्पाङले पनि प्रतियोगीसँगै केहीबेर साइकल चढेका थिए । पुरस्कार वितरण कार्यक्रममा बोल्दै मेयर साम्पाङले खेलाडीहरुलाई उत्साह थप्न यस्ता प्रतियोगिता भइरहनुपर्ने बताए ।
प्रतियोगितामा महिलातर्फ निक्की नेम्वाङ पहिलो, इषा तामाङ द्वितीय र निसान चौधरी तृतीय भएका थिए भने पुरुषतर्फ किरण लिम्बू, नवीन तामाङ, अनीश तामाङ क्रमशः पहिलो, दोस्रो र तेस्रो बनेका थिए । उनीहरूले नगद क्रमशः १५, १० र ५ हजार रुपैयाँ र प्रमाणपत्र प्राप्त गरेका छन् । उनीहरुलाई मेयर साम्पाङ, उपमेयर अइन्द्रविक्रम बेघालगायतले प्रमाणपत्र र नगद प्रदान गरे ।
धरान उपमहानगरपालिकाको गेटबाट शुरु प्रतियोगिता रुट चतरालाइन, कल्याणचौक, बुद्धचौक, रत्नचौक, मङ्गलबारे, जोरसखुवा चौक, गणेशमान चौक हुँदे धरान उपमहानगरपालिकासम्म तय भएको थियो । बिजेताले करिब सात किलोमिटरको दुरी १६ मिनेटमा पार गरेका थिए ।
यो प्रतियोगिताबाट उत्कृष्ट खेलाडी मध्येबाट पोखरामा हुन लागेको नवौं राष्ट्रिय खेलकुद प्रतियोगिताअन्तर्गत रोड रेस साइक्लिङ प्रतियोगितामा सहभागिताको लागि छनौट गरिने सुनसरी साइक्लिङ सङ्घका अध्यक्ष राजेन लिम्बूले बताए ।
तस्वीरः हाम्रो कोशी आवाज