धरानः ९ औं राष्ट्रिय प्रतियोगिताका लागि तयारी गरिरहेका सुनसरी महिला बास्केटबल टिमलाई झुना राईले आफ्नो झुनाज फिटनेस निःशुल्क प्रयोग गर्न दिने भएको छ ।
राईले प्रशिक्षणमा रहेका १२ जना महिला बास्केटबल खेलाडीहरुको फिटनेसका लागि आफ्नो फिटनेस सेन्टर निःशुल्करुपमा प्रयोग गर्न सहयोग गरेका हुन् । यही भाद्र ७ गते छनौट भएका सुनसरीका महिला र पुरुष बास्केटबल खेलाडीहरुले धरान रंगशाला कर्भडहलमा प्रशिक्षण गरिरहेका छन् । उनीहरुको थप फिटनेसका लागि जीम र स्वीमिङ सहयोगि हुने भएकोले सुनसरी बास्केटबल संघका पूर्व कोषाध्यक्ष समेत रहेकी झुनाले आफ्नो फिटनेस उपलव्ध गराएका हुन् । झुनाज फिट्नेसमा जीम हल, जुम्बा, एरोबिक, स्वीमिङ, स्पा, मसाज, सौना बाथ, पेडिकेयर, ब्युटी पार्लरलगायतको सुविधा रहेको छ ।
सुनसरी महिला बास्केटबल टिममा डा. आशा राई, तनु राई, सितल तामाङ, आस्था कुलुङ राई, निरुता राई, इक्सा लिम्बू, सम्झना राई, सेरिना लिम्बू, आशा लामा, एल्भिना गुरुङ, नुमा लिम्बू र तनिशा श्रेष्ठ रहेका छन । त्यस्तै, पुरुषतर्फ विवेकमनी श्रेष्ठ, दिवस राई, सुशन श्रेष्ठ, विकेन चौधरी, रवि बास्फोर, सन्दीप श्रेष्ठ, समिर राई, नविन राई, हेमन्त राई, योक राई, कविन मगर र साहिल तामाङ रहेका छन् ।
प्रशिक्षणमा रहेका सुनसरीका खेलाडीहरुले असोज पहिलो हप्ता प्रदेश १ खेलाडी छनौट प्रतियोगितामा सहभागिता जनाउनेछ । छनौट प्रतियोगिताबाट प्रदेश १ महिला र पुरुष बास्केटबल खेलाडी छनौट गरिनेछ । छनौट भएका खेलाडीहरुले प्रदेश १ को प्रतिनिधित्व गर्दै असोज २८ गते देखि शुरु हुने ९ औ राष्ट्रिय प्रतियोतिामा प्रतिस्पर्धा जनाउने सुनसरी बास्केटबल संघका अध्यक्ष नारायण सुवेदीले बताएका छन् ।