धरानः सुनसरी क्षेत्र नं. १ मा चुनावी माहौल तात्तिदै गएको छ । धेरै दलहरु मत माग्न घरघरमा पुगिरहेका छन्, कोही दलबलसहित चुनावमा छन् भने कोही एक्लै ।
धरानमा अहिलेका मेयर हर्कराज राई साम्पाङले एक्लै हिँडेर पनि चुनाव जितेको इतिहास ताजै छ । यसै क्रममा धरानमा एक व्यक्ति जो एक्लै भोट माग्दै हिँड्दै आएका छन् ।
धरान निवासी भुपी कोयी राई एक्लै भोट मागेर हिँडिरहेका छन् । किरात खम्बुवान साझा पार्टीबाट सुनसरी क्षेत्र नं. १ र २ बाट प्रदेशसभाको लागि प्रत्यक्षतर्फ उम्मेदवार बनेका उनी जनतालाई आफ्नो प्रतिबद्धता सुनाउँदै चोकचोक, घरघरमा पुगिरहेका छन् ।
धरानको भानुचोकस्थित लोकतान्त्रिक चौतारीमा आफ्ना प्रतिबद्धता सार्वजनिक गरेर चुनावमा होमिएका उनी अहिले घरघरमा भोट माग्दै हिँडिरहेका छन् । उनले भने, ‘शुरुमा एक्लै चोकचोकमा भाषण गर्दै हिँड्छु, त्यसपछि घरघरमा मत माग्दै हिँड्छु ।’
विशेषतः खम्बुवानले किरात सभ्यता, विरासत, पहिचानलाई सम्मान गर्दै प्रदेश १ लाई किरात प्रदेश नामाकरण सुनिश्चित गरिनुपर्ने आवाज उठाएका छन् । उनले धरानमा भुपुहरुले समाजमा गरेको योगदानलाई सम्मान गर्न कसैले नचाहेको हुनाले आफूले यो विषय पनि तड्कारोरुपमा उठाउँदै हिँडेको बताए ।
उनले आफ्नो प्रतिबद्धतापत्रमा शिक्षा, स्वास्थ्यलाई समेट्दै धरानमा दीर्घकालीनरुपमा खानेपानीका लागि सप्तकोशीको चतराबाट सरकारको लगानी हुनुपर्ने जिकीर समेत गरेका छन् । उनले किरात प्रदेशअन्तर्गत पूजातान्त्रिक योद्दा रामप्रसाद राईको नाममा प्रज्ञा प्रतिष्ठान स्थापना हुनुपर्ने, नेपालको राजनीतिक इतिहास र परिवर्तनमा प्रजातान्त्रिक योद्दा रामप्रसाद राईको नेतृत्वले १०४ वर्षे जहाँनिया राणा शासनकालमा विनारक्तपात भोजपुर कब्जा गरेको समेत प्रतिबद्धतामा उल्लेख गरेका छन् ।
उनले चुनाव चिह्न नेपाली ढाका टोपी लिएर भोट मागिरहेको बताए ।