धरानः धरान–१३ मा डेरा गरी बस्ने उषा राईमाथि कुटपिटमा संलग्नलाई सार्वजनिक गरिनुपर्ने र सार्वजनिकपछि कडा कारवाहीको माग गर्दै धरानस्थित भानुचोकमा बृहत प्रदर्शन भएको छ ।
सचेत धराने समूहले त्यहाँ शान्तिपूर्ण प्रदर्शन गरेको छ । समूहका सचिव राम लिम्बूले मृतकलाई न्याय दिनुपर्ने, दोषीलाई सार्वजनिक गर्दै कडाभन्दा कडा कारवाहीको माग गर्दै शान्तिपूर्ण प्रदर्शन कार्यक्रम आयोजना गरिएको बताए ।
यसैबीच प्रहरीले उषामाथि कुटपिटमा संलग्नताको आरोपमा प्रहरीले तीनजनालाई पक्राउ गरेको छ । पक्राउ पर्नेमा धरान–१३ का उर्मिला राई, सुशेली राई र सुमित्रा राई रहेको इलाका प्रहरी कार्यालय धरानका डिएसपी बुद्ध श्रेष्ठले जानकारी दिए । उनीहरुमाथि आइतबार म्याद थप गरेर आइतबार नै सार्वजनिक गर्ने तयारी थालिएको उनले जानकारी दिए ।
धरान १३ मा डेरा गरी बस्ने उषामाथि कुटपिट भएको एक महिनापछि मृत्यु भएको थियो । आन्दोलनरत महिलाहरुको अडानको कारण मृतकको पोष्टमार्टम शनिबार पनि भएको थिएन ।
आफ्नो श्रीमानसँग नजिकिएको भन्दै आफन्त र केही महिलाहरुसहित गएर कार्तिक ३ गते उषा राईलाई कुटपिट गरेका थिए । कुटपिटपछि एकखाले सहमति पनि भएको तर विभिन्न केमिकल मिसिएको झोल पदार्थ उषालाई पिलाएको र उनको स्वास्थ्य अवस्था गम्भीर बनेपछि धरानस्थित बीपी प्रतिष्ठानमा थप उपचारका लागि लगिएको थियो । दुई छोरीको साथमा कपडा सिलाएर जीविकोपार्जन गर्दै आएकी उषाको श्रीमानको पनि मृत्यु भइसकेको जनाइएको छ । अहिले उषाकी दुई छोरीको पनि विचल्नी भएको छ ।