धरानः कुटपिटबाट मृत्यु भएकी धरान-१३ की उषा राईको शनिबार अन्त्येष्टी भएको छ ।
न्यायको लागि आन्दोलनरत पक्ष र परिवारबीच शव जिम्मा लिने एकखाले सहमतिपछि उनको अन्त्येष्टी भएको हो ।
कुटपिट भएको महिना दिनपछि उपचारको क्रममा मृत्यु भएकी उषा राईको शनिबार राति अन्त्येष्टी गरिएको हो । एकखाले सहमतिपश्चात् पोष्टमार्टम गरिएको र पोष्टमार्टमपछि शवको अन्त्येष्टी गरिएको इलाका प्रहरी कार्यालय धरानका डिएसपी बुद्ध श्रेष्ठले जानकारी दिए । मृतक उषाको धरानस्थित खत्रीधारामा रहेको दाहसंस्कारस्थलमा अन्त्येष्टी गरिएको थियो ।
निकै कडा सुरक्षाका बीच धरानस्थित बीपी प्रतिष्ठानको मर्चरीमा राखिएको शव धरानस्थित खत्रीधारामा लगिएको थियो । दिनभरजसो तनावपूर्ण बनेको बीपी प्रतिष्ठानस्थित मर्चरीमा राखिएको शव निकाल्न नदिने भन्दै केही महिला समूहहरुले विरोध पनि गरेका थिए । तर परिवार पक्षले पोष्टमार्टम गरेपछि अन्त्येष्टी गर्ने र त्यसपछि पनि दोषीलाई कारवाहीको लागि खबरदारी गर्ने भन्दै शव जिम्मा लिएका थिए ।
धनकुटाको शहिदभूमी गाउँपालिका घर भएकी उषा धरान–१३ सूर्य मार्गमा डेरा गरी बसेकी थिइन् । धरान १३ कै उर्मिला राई नाम गरेकी महिलाले आफ्नो श्रीमान् गोविन्दसँग नजिकिएको भन्दै उषालाई महिलाहरु लगेर मरणासन्न हुनेगरी कुटपिट गरेकी थिइन् । आफन्तजन र अन्य महिलाहरुले पनि कुट्न सघाएका थिए । त्यतिबेला केही झोलिलो पदार्थ समेत उषालाई खुवाइएको पाइएको प्रहरीले जनाएको छ ।
श्रीमानको समेत मृत्यु भइसकेकी उनको दुई छोरी छन् । आफ्नो श्रीमानसँग नजिकिएको भन्दै आफन्त र केही महिलाहरुसहित गएर कार्तिक ३ गते उषा राईलाई कुटपिट गरेका थिए । अहिले उषाकी दुई छोरीको पनि विचल्नी भएको छ ।
धरान–१३ का वडाध्यक्ष नेत्र काफ्लेले दुई छोरीको लालनपालनका लागि १० लाख रुपैयाँ दिने एकखालको गोप्य सहमति बनेको बताएका छन् ।