धरानः हिसान सुनसरीको आयोजनामा आयोजित हिसान बास्केटबलमा धरान मेघा–हिमालयन कलेजका छात्रछात्रा दुवै टिम फाइनलमा प्रवेश गरेका छन् ।
मेघासँगै छात्रतर्फ एम्स एकेडेमी र छात्रातर्फ धरान उच्च मावि फाइनलमा प्रवेश गरेका हुन् । शुक्रबार भएको सेमिफाइनल खेलमा छात्रतर्फ धरान मेघाले लोटस स्कुललाई ३६–१८ र एम्स एकेडेमीले धरान आदर्शलाई ३८–३२ अंकको अन्तरले पराजित गर्दै फाइनलमा स्थान सुरक्षित गरेका थिए । यसैगरी छात्रातर्फ धरान मेघाले जेनिथ होलिल्याण्डलाई १२–६ र धरान उच्चले सियोन स्कुललाई २८–१० अंकको अन्तरले पराजित गर्दैै फाइनल यात्रा गरेका हुन् ।
क्वाटर फाइनलमा छात्रतर्फ एम्सले विष्णु मेमोरियललाई ४२–३०, छात्रातर्फ धरान उच्चले विष्णुलाई नै ९–५ र मेघा कलेजले धरान आदर्शलाई १८–५ अंकको अन्तरले पराजित गर्दै फाइनलमा प्रवेश गरेका थिए ।
शुक्रबार भएको खेलमा छात्रातर्फ धरान मेघा कलेजका सम्झना राईले क्वाटर फाइनल र सेमीफाइनल खेलमा, धरान उच्चका सन्ध्या राई, इक्सा लावती म्यान अफ द म्याच घोषित भए । छात्रतर्फको खेलमा एम्स एकेडेमीका सिमोन राई र सितम लिम्बू र धरान मेघा कलेजका योगेश राई म्यान अफ द म्याच घोषित भए । उनीहरुलाई हिसान बास्केटवलका संयोजक अर्जुन घिमिरे, हिसान स्पोर्टस मिटका संयोजक हेमन्त भण्डारी र धरान मेघा हिमालयन कलेजका अध्यक्ष कैलाश लिम्बूले मेडल प्रदान गरेका थिए ।
फाइनल खेल शनिबार बिहान ७ बजे छात्रातर्फ धरान मेघा र धरान उच्च मावि र साढे ८ बजे छात्रतर्फ धरान मेघा र एम्स एकेडेमीबीच फाइनल खेल हुनेछ । धरान बास्केटबल संघको प्राविधिक सहयोगमा सम्पन्न प्रतियोगिताको सम्पूर्ण खेल धरान मेघा हिमालयन कलेजको बास्केटबल कोर्टमा भइरहेको छ ।