धरानः हाम्रो कोशी आवाज डटकमका फोटो सम्पादक लक्ष्मण थापा सम्मानित भएका छन् ।
उनलाई सम्मान–पत्रसँगै २० हजार रुपैयाँको पुरस्कार राशी प्रदान गरिएको थियो । नेपाली कांग्रेस सुनसरीका संस्थापक सचिव तथा सुनसरी धरानका अग्रज पत्रकार गिरिराज आचार्यको सम्मानमा स्थापना गरिएको ‘श्री गिरिराज आचार्य सृजनशील पत्रकारिता पुरस्कार’ बाट उनी सम्मानित भएका हुन् । नेपाली कांग्रेस र नेपाल प्रेस युनियन धरान उपमहानगर समितिको सहकार्यमा शनिबार एक कार्यक्रमका बीच यसवर्षको सो पुरस्कार उनलाई प्रदान गरिएको हो ।
विभिन्न पत्रपत्रिकामा यसअघि आवद्ध हुँदै स्थापनाकालदेखि नै हाम्रो कोशी आवाज डटकमको फोटो सम्पादक रहेका उनलाई प्रमुख अतिथि कांग्रेस प्रदेश १ का महामन्त्री उमेश थापाले उनलाई पुरस्कार प्रदान गरेका थिए । ५१ वर्षीय पत्रकार थापाले २०५७ साल देखि फोटो पत्रकारितामा प्रवेश गरेका थिए ।
नेपाली कांग्रेस र नेपाल प्रेस युनियनको सहकार्यमा प्रत्येक वर्ष पुरस्कार प्रदान गर्न काँग्रेसका धरान उपमहानगर सभापति तथा पूर्व मेयर तिलक राईले उपमहानगरपालिकाबाट नगर प्रमुख हुँदा समयमा प्राप्त भएको सेवा सुविधा भत्ताको रकमबाट कुल २ लाख रुपैयाँ प्रदान गरी सो अक्षयकोष स्थापना गरेका हुन् । सोही अक्षयकोषको रकमबाट सो सम्मान गरिएको आयोजक प्रेस युनियन धरान नगर समितिले जनाएको छ ।
कार्यक्रममा धरान उपमहानगरपालिकाका पूर्व मेयर तिलक राई, कँंग्रेस सुनसरीका सचिव सुजेन्द्र गोले तामाङ, काँग्रेस धरानका सभापति श्याम पोख्रेल र अग्रज पत्रकार हर्ष सुब्बा, नेपाल पत्रकार महासंघका केन्द्रीय सदस्य भीषण राई, नेपाल पत्रकार महासंघ सुनसरीका अध्यक्ष जनकऋषि राईलगायतको उपस्थितिमा सो कार्यक्रम सम्पन्न भएको थियो ।
कार्यक्रममा अधिकांश वक्ताहरुले पूर्व मेयर राईले अग्रज पत्रकार तथा नेपाली कांग्रेस सुनसरीका संस्थापक सचिव गिरिराज आचार्यको योगदानको कदर गर्दै उनको सम्मानमा पत्रकारिता पुरस्कार खडा गरिएको बताएका थिए ।