धरानः विशेषतः पर्यटकीय सम्भावना बोकेको धरान-२० विष्णुपादुका क्षेत्र वर्षेनी राज्यको ध्यान नदिँदा पछाडि नै परेको छ ।
धरानको धेरै क्षेत्रफल समेत ओगटेको सो क्षेत्रमा अहिलेसम्म सडक कालोपत्र नहुँदा सर्वसाधारणले सास्ती खेप्दै आएका छन् । धरान–२० लाई ‘पर्यटन गाउँ’ पनि भनिन्छ तर सडककै कारण पछाडि समेत परेको छ ।
हाल देवीगाउँ–भज्याङ सडक धमाधम कालोपत्र हुँदैछ । प्रदेश र संघको करिब एक करोड रुपैयाँ साथै थप संघको थप ९७ लाख रुपैयाँको लागतमा धमाधम सडक कालोपत्रे भइरहेको वडाध्यक्ष पदमबहादुर लिम्बूले जानकारी दिए । गएको वर्ष सो सडक ३ सय मिटर कालोपत्रे भएको थियो ।
सो वडामा प्रसिद्ध धार्मिकस्थल विष्णुपादुका, कोकाह, चिण्डेडाँडा, ऐतिहासिकस्थल साँगुरीगढी र सुलिकोटलगायतका रमणीयस्थल रहेका छन् । विसं २०७१ मङ्सिर २६ गते सरकारको निर्णयानुसार छुट्टै गरेको विष्णुपादुका गाविसलाई धरान उपमहानगरपालिकामा गाभिएपछि वडा नं २० मा बनेको हो ।
पदमार्ग, क्यानोनिङ, प्याराग्लाइडिङ, साइक्लिङलगायत सम्भावना भएको विष्णुपादुकामा उद्योगधन्दा, कलकारखाना पनि स्थापना गर्ने धरानका मेयर साम्पाङले योजना बनाएका छन् । उनले त्यहाँ साबुन, बेसार फ्याक्ट्री निर्माण साथै टर्वाइनबाट बिजुली निकाल्ने योजनामा समेत रहेको बताए ।
विष्णुपादुका जस्तो पौराणिम महत्व बोकेको मन्दिर पनि यही भएकोले धार्मिक पर्यटनको प्रचुर सम्भावना भएको ठाउँका रुपमा लिइन्छ । सहरमा गाभिएपछि सडक पक्की बन्ने भएपछि स्थानीयको सपना पूरा हुने आशा रहेको वडाध्यक्ष लिम्बूले बताए । हरेक निर्वाचनमा उम्मेदवारहरुले विष्णुपादुकामा पक्की सडक निर्माणको कुरा गरेपनि चुनाव जितेपछि प्रतिबद्धता बिर्सिदा यतिका वर्ष सो सडकले गर्दा स्थानीयले सास्ती खेप्दै आएका थिए ।