धरानः धरानमा जारी अन्तर्राष्ट्रिय बुढासुब्बा टुबोर्ग गोल्डकप फुटबल प्रतियोगिताको क्यामरुनको एभिनियर फुटबल क्लब सेमिफाइनलमा प्रवेश गरेको छ ।
बागमती युवा क्लबलाई १–० गोल अन्तरले पराजित गर्दै एभिनियर क्लब सेमिफाइनलमा प्रवेश गरेको हो । आइतबार भएको प्रतिस्पर्धात्मक खेलमा क्यामरूनी टोलीका सावाँ अलीले खेलको १४ मिनेटमा गोल गरेका थिए । उनले प्रिन्सको पासमा हेड गोल गरे ।
खेलअवधिभर दुवै टोलीबाट गोल गर्ने थुप्रै अवसर पाएपनि सदुपयोग गर्न भने सकेनन् । खेलको म्यान अफ दि म्याच बागमती युवाका आयुष राना घोषित भए । उनले नगद १० हजार हात पारे । उनलाई धरानका उपमेयर अइन्द्रविक्रम बेघा र व्यवसायी कुन्दन श्रेष्ठले पुुरस्कार वितरण गरेका थिए ।
प्रतियोगितामा सोमबारको खेल झापाको केएफटिसी र नेपाल पुलिस क्लब बीच खेल हुने आयोजकले जनाएको छ । फागुन २० सम्म चल्ने प्रतियोगिताको बिजेताले १० लाख पाउनेछ भने उपविजेताले नगद ५ लाख पाउनेछ । त्यस्तै, प्रतियोगिताको उत्कृष्ट खेलाडीलाई नगद १ लाख दिइने पनि आयोजक धरान फुटबल क्लबले जानकारी दिएको छ ।
तस्वीरः लक्ष्मण थापा