धरानः धरान–१६ स्थित रंगशालामा जारी २३ औं बुढासुब्बा टुबोर्ग गोल्डकपअन्तर्गत सोमबार भएको खेलमा नेपाल पुलिस क्लबलाई हराउँदै झापाको काकडभिट्टा ट्रेनिङ सेन्टर सेमीफाइनल प्रवेश गरेको छ ।
पुलिसलाई २–० ले हराउँदै काकडभिट्टा सेमीफाइनल प्रवेश गरेको हो । निशान लिम्बूले पहिलो हाफको २० औं मिनेट र दोस्रो हाफको ३५ औं मिनेटमा गोल गर्न सफल बनेका थिए । खेलको म्यान अफ दि म्याच घोषित हुँदै उनले नगद १० हजार पनि हात पारेका छन् ।
२०७६ को २२ औ संस्करणको क्वाटरफाइनलमा पुलिस ३–१ ले विजयी भएको थियो । २० औ संस्करणमा समेत पुलिसले खेल २–० गोल अन्तरले केएफटिसीलाई हराएको थियो । सोमबारको खेल काकडभिट्टाको लागि पराजयको बदला लिने अवसर बन्यो ।
जुमानु राईको कप्तानीमा उत्रिएको टोलीमा पूर्व राष्ट्रिय खेलाडी भोला सिलवाल, सुमन सुवेदी, बुद्ध लामा, हेम तामाङ, मानबहादुर परियारलगायतका खेलाडी थिए । यस्तै, काकडभिट्टाको लागि कप्तानीमा खमिर गिल्सन कन्दङवा साथै निशान लिम्बू, दिवस उराउ, मिलन राई, विश्वास श्रेष्ठ, सुशील राई, विदेशी खेलाडी योमी लगायत थिए । २०५६, २०५७, २०५९ र २०७३ मा उपाधि जितेको पुलिस ६ पटक उपविजेता समेत थियो तर पनि उसले यसपटक हार व्यहोर्दै फर्किएको छ । तस्वीरः लक्ष्मण थापा