धरान: धरान रङ्गशालामा जारी धरान एक्स्पोको दशौं दिन (शनिबार) गायक यबेश थापाले साङ्गीतिक प्रस्तुति दिने भएका छन् ।
‘लाखौं हजारौं’बाट चर्चा बटुलेका गायक थापालाई नेपाली साङ्गीतिक क्षेत्रका राइजिङ स्टारका रुपमा चर्चा गर्ने गरिन्छ ।
सन् २०२० मा लाखौं हजारौंसहित नेपाली संगीतमा डेब्यू गरेका थापाले निकालेका सबै गीत रुचाइएका छन् ।
थापाका ‘ए मुटु’, ‘झरी’, ‘के हुन्छ भनेर’, ‘मायालु’, ‘मेरो प्रिय’, ‘अलपत्र’ लगायत गीत चर्चित छन् ।
पप जर्नलाई आफ्नो छुट्टै स्वादसहित प्रस्तुत गरिरहेका गायक थापालाई धरान एक्स्पोमा आज स्थानीय कलाकार र समूहले साथ दिने एक्स्पोका संयोजक गोपाल श्रेष्ठले जानकारी दिएका छन् ।
सुनसरी क्षेत्रको व्यवसायीक, कृषि, औद्योगिक, व्यवसायीक, साहित्य, शैक्षिक, सूचना तथा प्रविधि, पर्यटन क्षेत्रको प्रवद्र्धन गर्ने उद्देश्यसहित धरान रङ्गशालामा फागुन ११ बाट सुरु भएको एक्स्पोको आज औपचारिक समापन हुँदैछ ।
सुनसरी उद्योग वाणिज्य संघको आयोजनमा सञ्चालन भइरहेको एक्स्पोमा रैथाने, नेपाल, भारत, बंग्लादेश र पाकिस्तानका एक सय २३ स्टल अवलोकन गर्न सकिन्छ ।
एक्स्पोमा आउन धरानका पाँच स्थानबाट निःशुल्क बस सेवा उपलब्ध गराइएको छ भने एक्स्पो स्थलसम्म सञ्चालन हुने अटोको भाँडादरमा विशेष छुट प्रदान गरिएको छ ।
दिउँसो तीन बजेसम्म निःशुल्क प्रवेशको व्यवस्था गरिएको एक्स्पोमा दिउँसो तीन बजेदेखि पाँचसम्म प्रति टिकट ५० रुपैयाँ र पाँच बजेपश्चात्त टिकट दर दुई सय रुपैयाँ निर्धारण गरिएको छ ।