धरानः ७ औं संस्करणको राष्ट्रिय हराइजन रनिङ कप बास्केटबल आईतबारदेखि शुरु भएको छ ।
धरान–१७ स्थित श्री माविको खेल मैदानमा शुरु प्रतियोगितामा आयोजक टिम हराइजन क्लबले विजयी सुरुवात गरेको छ ।
आयोजकले ज्याकवट क्लब झापालाई ४४ का विरुद्ध ७२ स्कोरले पराजित गरेको छ । प्रतियोगितामा सर्वाधिक १९ स्कोर गरेका आयोजकका प्रविन मगर म्यानअफ द म्याच भए । आजको खेल विभागीय टिम नेपाल पुलिस क्लब र हलिल्याण्ड इन्टरनेशनल कलेज धरानबीच हुनेछ । फागुन २७ गतेसम्म चल्ने प्रतियोगिताको उपाधि बिजेताले नगद १ लाख ११ हजार र उपविजेताले ५५ हजार पाउनेछ ।
प्रतियोगितामा दुई विभागीय सहित ८ टिमको सहभागिता छ । २०६९ सालदेखि शुरु भएको हराइजन रनिङ कप बास्केटबल काठमाण्डौ उपत्यका बाहिर सञ्चालन हुँदै आएको नेपालको पहिलो बास्केटबल प्रतियोगिता हो । खेलको उद्घाटन धरान–१७ का वडाध्यक्ष मनोज भट्टराई (सूर्य) गरेका थिए । कार्यक्रममा हराईजन क्लबका अध्यक्ष भक्त राई, क्लबकै पूर्व अध्यक्ष वसन्त राई र पत्रकार महासंघ सुनसरीका अध्यक्ष जनकऋषि राईलगायत उपस्थिति रहेको थियो ।
तस्वीरः लक्ष्मण थापा