धरानः धरानको पानबारीमा निःशुल्क आँखा शिविर सम्पन्न भएको छ ।
सूर्य आई केयर सेन्टर धरानको प्राविधिक सहयोगमा गत शनिबार सो शिविर आयोजना भएको हो । श्री कृष्णप्रणामी युवा परिषद्, धरान–६ को आयोजनामा एवम् श्री कृष्ण प्रणामी युवा समाजको सहयोगमा सम्पन्न सो शिविरमा १२८ जनाको आँखा परीक्षण गरिएको परिषद्का अध्यक्ष गौरव आचार्यले बताए ।
कृष्ण प्रणामी मन्दिर, पानबारी परिसरमा आयोजना गरिएको शिविरमा १३ जना बिरामीको आँखामा मोतिविन्दु देखिएको सूर्य आई केयरका प्रबन्ध निर्देशक तथा आँखा रोग विशेषज्ञ डा. इच्छा जोशी सोनीले बताइन् । डा. सोनीका अनुसार आँखामा रोगको उपचार गर्नुभन्दा पनि रोग लाग्न नदिन जनचेतना जगाउन आवश्यक रहेको बताएकी छिन् ।
शिविरमा निःशुल्क सुगर परीक्षण, ब्लड प्रेशर जाँच, औषधि वितरण समेत गरिएको थियो । शिविर सामाजिक अभियन्ता विष्णु बराल, मोहन श्रेष्ठको संयोजनमा भएको थियो । ग्रामीण भेगमा आयोजित शिविर स्थानीय जनसमुदायका लागि निक्कै नै प्रभावकारी भएको श्री कृष्ण प्रणामी युवा समाज सुनसरीका अध्यक्ष प्रमोद आचार्यले बताए । आचार्यका अनुसार समाजले स्थानीयस्तरमा समुदायमा लक्षित गरी विभिन्न कार्यक्रमहरु आयोजना गर्दै आइरहेको छ ।