विराटनगरः मोरङको लेटाङमा एक वृद्धले शरीरमा पेट्रोल छर्केर आत्मदाहको प्रयास गरेका छन् ।
एकाबिहानै लेटाङ–७ का ६५ वर्षीय गोविन्दप्रसाद नेपालले पेट्रोल खन्याएर आगो लगाएको मोरङ प्रहरीका प्रवक्ता तथा प्रहरी नायब उपरीक्षक रञ्जनकुमार दाहालले जानकारी दिए । हाल उनको अवस्था गम्भीर रहेको छ । उनको विराटनगरस्थित रेडक्रस अस्पताल एन्ड ट्रमा सेन्टरमा उपचार भइरहेको छ ।
स्थानीयले आगो लागेको मानिस देखेपछि प्रहरीलाई खबर गरेका थिए । स्थानीयले नै पानी हालेर नेपालको शरीरमा लागेको आगो निभाएका थिए । उनका अनुसार सुरुमा वृद्ध ग्यालेनमा पेट्रोल लिएर आएको खुलेको छ । विराटनगर महानगरपालिका–४ तित्रिगाछीमा पुगेपछि पेट्रोल आफ्नै शरीरमा छर्किएर एक्कासी आगो लगाएको प्रारम्भिक अनुसन्धानबाट पत्ता लागेको प्रहरीले जनाएको छ । वृद्ध नेपालको आफन्तसँग लेनदेन विवाद रहेको पाइएको छ । नातामा बहिनी पर्ने आफन्तलाई लामो समयअघि पैसा सापटी दिएको र माग्न जाँदा भनाभन समेत भएको पाइएको प्रहरीले जनाएको छ । त्यही पैसा उठाउन जाने क्रममा विवाद भएपछि शरीरमा पेट्रोल छर्किएर आगो लगाएको हुनसक्ने प्रहरीको अनुमान छ ।