धरानः धरान उपमहानगरपालिकाका मेयर हर्कराज राई साम्पाङले चलाएको अभियानमा योपटक हजारौं श्रमदाता सहभागी भएका छन् ।
करिब ५ हजारभन्दा बढी श्रमदाता उपस्थित भएका थिए । धरान, इटहरी, बुटवल साथै चितवनसम्मका श्रमदाता यसपटक सहभागी भएका थिए । शनिबार अर्थात् श्रमबारका दिन लाहुरेको कथा समेटिएको साथै धरानमै सुटिङ गरिएको नेपाली चलचित्र जेकी आइम २१ का कलाकार पनि उपस्थित थिए ।
बैशाख २१ गते रिलिजको तयारीमा रहेको नेपाली चलचित्र ज्याकीका कलाकार धिरज मगर, जसिता गुरुङ, प्रेम सुब्बा, नायिका रेखा लिम्बू, गीतकार मिना सिङ्गकलगायतका कलाकारहरुको पनि उपस्थिति थियो । सो टिमले मेयरको अभियानलाई ५० हजार प्रदान गर्ने घोषणा समेत गरेको छ ।
यस्तै, बुटवलबाट दुई बस विद्यार्थी (७५ जना)को पनि सहभागिता थियो । यसैबीच कोकाह खोला अभियानका लागि २३ लाख ९० हजार २३५ रुपैयाँ प्रदान गरिएको छ । युकेबाट पठाएको रकम पूर्णप्रसाद लिम्बूले प्रदान गरेका थिए । हर्क साङपाङ सपोर्ट कमिटी युकेले यसअघि निशाने खोलाको लागि ५८ लाख ७६ हजार आर्थिक सहयोग गरिसकेको छ ।
यस्तै, धरान १५ नौलो टोल विकास संस्थाले ५१ हजार रुपैयाँ प्रदान गरेको थियो । यस्तै, शनिबारको श्रमदातालाई धरान कुक समाजले खाना खुवाएका छ । समाजका अनुसार ५ हजार बढीलाई खाना खुवाइएको हो ।

]