धरानः धरान–१२ स्थित एम्स एकेडेमी (प्लस टु)ले प्रथम एम्स एसईई फुटसल कप गर्ने भएको छ ।
अध्यापक एवम् शेयर सदस्य बिदुर महतले प्रेस विज्ञप्ति वाचन गरे । प्रतियोगिता आगामी बैशाख २९ र ३० गते मितेरी फुटसलमा हुने कार्यक्रम संयोजक युवराज अधिकारीले जानकारी दिए ।
एसईई दिएर बसेका विद्यार्थीहरुको खाली समयको सदुपयोग गर्दै अन्य गलत काममा नलागी सिर्जनात्मक काममा लागुन भन्ने उद्देश्यले प्रतियोगिताको आयोजना गरिएको संयोजक अधिकारीले जानकारी दिए ।
प्रतियोगितामा २० वटा टिम सहभागी हुने संयोजक अधिकारीले बताए । एसईई कपको बिजेताले नगद १५ हजार, उप–बिजेताले १० हजार रुपैयाँ प्राप्त गर्ने आयोजकले जनाएको छ । त्यस्तै, उत्कृष्ट खेलाडी र प्रतियोगिता अवधिभर उत्कृष्ट प्रदर्शन गर्ने खेलाडीहरुलाई समेत पुरस्कारको ब्यवस्था रहेको छ ।
प्रतियोगितामा विशेषगरी धरानभरिका सामुदायिक र निजी विद्यालयबाट ०७९ को एसईई दिएका विद्यार्थीहरुले मात्रै भाग लिन पाउने प्रिन्सिपल मित्र तामाङले बताए । ‘धरान बाहिरबाट आए भने पनि हामी सहभागी गराउँछौं’, उनले भने । कार्यक्रमको सञ्चालन कोअर्डिनेटर हेमन्त भण्डारीले गरेका थिए ।