धरानः धरानको महेन्द्र बहुमुखी क्याम्पसको पार्किङ एरियाबाटै मोटरसाइकल चोरी भएको छ ।
सार्वजनिक एरियाबाटै मोटरसाइकल चोरी भएपछि चोरी भएको थाहा पाउने विद्यार्थी चकित परेका छन् । बिहान ११ बजे कलेजमा अध्ययन सकेर हेर्दा मोटरसाइकल नदेखिएपछि बिबिएमको पाँचौं सेमेस्टरमा अध्ययनरत सुरज योङहाङ तनावमा परेका थिए । योङहाङको को३९प ९३७८ को नम्बरको मोटरसाइकल क्याम्पस परिसरबाटै चोरी भएको हो ।
खोजी गर्दै जाँदा सीसी क्यामेराको फुटेज हेर्दा एकजना ‘हिरोजस्तै देखिने’ व्यक्तिले फिल्मीशैलीमा मोटरसाइकल चढेर गएको देखेपछि उनी झन तनावमा परेका थिए । पछि अन्य स्थानको सीसी क्यामेराको फुटेज हेर्दा धरान–१० राँगाचोकतिर लिएको गएको देखिएको उनले बताए ।
उनले कजेलकै विद्यार्थीले चोरेको हो कि भन्ने आशंका समेत व्यक्त गरेका छन् । कलेज बाहिरको सीसी क्यामेरामा सो फुटेज कैद भएको र कलेजभित्रको सीसी क्यामेरा बन्द गरिएको पाइएको उनले जानकारी दिए । ‘बाहिरतर्फको फुटेज हेर्दा खासै चिनिँदैन’, उनले भने, ‘कलेजभित्रको सीसी क्यामेरा बन्द गरिएको पाइएको छ, भोलि यस विषयमा थप जानकारी लिनेछौं ।’
उनले कलेज प्रशासनले पनि यस घटनाको जिम्मेवारी लिनुपर्ने बताए । ‘क्याम्पस हाताबाटै क्याम्पसले तोकेकै पार्किङ एरियाबाट मोटरसाइकल हराएको छ, यो घटनाको जिम्मेवार क्याम्पस प्रशासन पनि हो । विद्यार्थीको हक, अधिकार र सुरक्षाको जिम्मेवार पक्ष केही हदसम्म स्वतन्त्र विद्यार्थी युनियन र विद्यार्थी सङ्गठनहरू पनि रहकोले स्ववियु र विद्यार्थी संगठनले पनि यो घटनाको दोषी पत्ता लगाएर कानुनी दायरामा ल्याउन सहयोग गर्नुपर्दछ, आइन्दा यस्ता घट्ना नदोहोरियोस् भन्नका लागि कलेज प्रशासनले कलेज हाताभित्रको सुरक्षामा विशेष कदम चालोस् ।’ उनले भने ।

अहिले धरानमा मोटरसाइकल चोरी गर्नेहरु सक्रिय रहँदै आएको गुनासो बढ्न थालेको छ ।