धरानः धरानको सुनाखरी एकेडेमी पढाइका साथै अतिरिक्त क्रियाकलापमा पनि खरो उत्रिन सक्छन् भन्ने कुरा जुनसुकै प्रतियोगितामा जितिरहने विद्यार्थीबाट प्रमाणित हुन्छ ।
पढाइका साथै अतिरिक्त क्रियाकलापमा पनि सक्दो जोड दिँदै अघि बढिरहेको धरान-१२ चतरालाइनस्थित सुनाखरीका विद्यार्थी जुनसुकै प्रतियोगितामा भाग लिए पनि कुनै न कुनै उपाधि जितेरै फर्किएका हुन्छन् ।
यसैबीच नृत्य, गायन, कराँतेलगायतका विधामा सुनाखरीका विद्यार्थी अब्बल छन् भन्ने प्रमाणित भएको छ । कराते क्षेत्रमा इतिहास कायम गर्दै फेरि पनि विद्यार्थीले कोशी प्रदेशस्तरीय प्रतियोगितामा अब्बलता सावित गरेका छन् ।
शिवसताक्षी सितोरियो कराते एकेडेमी झापाद्वारा गत वैशाख २२ र २३ गते आयोजित आमन्त्रित खुल्ला कराते प्रतियोगिता २०८० मा तीन स्वर्ण, १ रजत र १ कास्य पदक जित्न सफल भएको प्रिन्सिपल मिलनकुमार राईले जानकारी दिए । उनका अनुसार स्कुल प्राङ्गणमा विद्यार्थीसामु आयोजित कार्यक्रममा बिजेता बन्न सफल विद्यार्थीलाई सम्मान पनि गरिएको छ ।
कक्षा–११ का उज्वल राई, कक्षा–१० की वर्षा राई, कक्षा–५ की स्तुम राई, कक्षा–४ का मिकसन लिम्बू र कक्षा–५ की मिनियाङ लिम्बूलाई सम्मान गरिएको उनले जानकारी दिए ।
प्रिन्सिपल राईका अनुसार पढाइमा विशेष जोड दिँदै खेलकुदलगायत अतिरिक्त क्रियाकलापमा पनि विद्यार्थी खरो उत्रिँदै आएको बताए । उनले विद्यार्थीले स्थानीय, प्रदेश र राष्ट्रिय, अन्तर्राष्ट्रियस्तरका प्रतियोगितामा सामेल भएर जित्दै आएको बताए ।