धरानः धरानमा दुर्घटना हुँदा एकजनाको मृत्यु भएको छ । धरान-१३ मा दुर्घटना हुँदा एक महिलाको मृत्यु भएको प्रहरीले जनाएको छ ।
धरान-१३ पानी ट्याङ्की मोडअन्तर्गत कोशी लोकमार्गमा दक्षिणबाट उत्तरतर्फ जाँदै गरेको प्र १०२०५० प ६६७३ नम्बरको मोटरसाइकलले पैदलयात्री (तत्काल नाम, थर वतन नखुलेकी अन्दाजी ६५-७० वर्षीया महिलालाई ठक्कर दिँदा उनको मृत्यु भएको इलाका प्रहरी कार्यालय धरानका डिएसपी नवराज मल्लले जानकारी दिए ।
उनको टाउको, हातखुट्टामा चोट लागि गम्भिर अवस्थामा धरानस्थित बीपी कोइराला स्वास्थ्य विज्ञान प्रतिष्ठान धरानमा उपचारका क्रममा सोमबार बिहान साढे १ बजे मृत्यु भएको प्रहरीले जनाएको छ ।
मोटरसाइकल चालक धरान-११ का ३३ वर्षीय रमन श्रेष्ठ प्रहरी चौकी अमरहाटको नियन्त्रणमा रहेको प्रहरीले जनाएको छ ।
यस्तै, हायस गाडीको ब्रेकफेल हुँदा चारजना घाइते भएका छन् । १६ जना सवार रहेको हायसमा घाइतेमध्ये एकजनाको अवस्था गम्भीर रहेको प्रहरीले जनाएको छ । धरान-४ नौ किलोस्थित कोशी लोकमार्गमा उत्तरबाट दक्षिणतर्फ आउँदै गरेको बा५ख २२९७ नम्बरको हायस माइक्रो ब्रेक फेल भई दुर्घटना हुँदा हायसमा सवार १६ जनामध्ये चारजना घाइते भएका हुन् ।
दुर्घटनामा इटहरी-१७ का रोशन सुन्दास, मोरङको विराटनगर-६ का भीमा इङनाम, झापाको कन्काइ-६ का बालिका अधिकारी, तेह्रथुमको लालीगुराँस ३ का किशोर लिम्बू घाइते भएका छन् ।