धरानः यही जेष्ठ १९ गतेदेखि काठमाडौमा हुन लागेको मदन– भण्डारी ओपन बास्केटबल प्रतियोगितामा प्रतिस्पर्धाका लागि जान लागेका धरान महिला बास्केटबल टिमलाई बुधबार बिदाइ गरिएको छ ।
धरान महिला टिमलाई धरान रंगशाला बास्केटबल कोर्टमा सुनसरी बास्केटबल संघका अध्यक्ष नारायण सुवेदीले जर्सी हस्तान्तरण गर्दै बिदाइ गरेका थिए । उनीहरु बिहिबार बिहान काठमाडौ प्रस्थान गर्नेछन् ।
मदन भण्डारी स्पोर्ट्स एकेडेमीको आयोजनामा हुन लागेको महिला–पुरुष ओपन बास्केटबल प्रतियोगितामा धरानबाट महिला टिमले सहभागिता जनाउन लागेका हुन् । धरानबाट राष्ट्रिय खेलाडी डा. आशा राइको कप्तानीमा तनु राई, आस्था राई, एल्भिना गुरुङ, इक्सा लिम्बू रन्जिता, रेनुका लिम्बू, निवा लिम्बू, नुमा लिम्बू, महिमा कटुवाल र दीया कोयु राई रहेका छन् भने प्रशिक्षकमा विकास चाम्लिङ राई र सहायक प्रशिक्षकमा युगल लिम्बू छन् ।
महिलातर्फ ६ वटा टिम रहेकामध्ये काठमाडौ बाहिरबाट धरान महिला टिमले मात्र सहभागिता जनाएको छ । राउन्डरोबिन आधारमा हुने प्रतियोगितामा धरानले ५ खेल खेल्नेछन् । बिदाइ कार्यक्रममा सुनसरी बास्केटबल संघका अध्यक्ष सुवेदीले खेलाडीहरुलाई सफलताको शुभकामना दिएका थिए । हार जित जे परिणाम आए पनि अनुशासित भएर आफूले सक्दो उत्कृष्ट प्रदर्शन गर्न खेलाडीहरुलाई सुवेदीले आग्रह गरे ।
धरान महिला टिममा बास्केटबल ट्यालेन्ट हन्टका विद्यार्थी
धरान टिममा पर्न सफल भएकी दिया कोयी भर्खरै मात्र एसइई दिएर बसेकी विद्यार्थी खेलाडी हुन् । उनी एसइईको नतिजाको पर्खाइमा छिन् । उनी केही दिनअघि मात्र धरान बास्केटबल संघद्वारा आयोजित ट्यालेन्ट हन्ट ट्रेनिङ क्याम्पमा सहभागी विद्यार्थी खेलाडी हुन् ।
संघले खेलाडी प्रोत्साहन गर्नका लागि ट्यालेन्ट हन्टका उत्कृष्ट एवं सम्भावित खेलाडीलाई अनुभवका लागि अवसर प्रदान गर्न धरान महिला टिममा स्थान दिइएको प्रशिक्षक विकास चाम्लिङ राइले बताए । प्रतियोगितामा धरानले ५ खेल खेल्नेछ । उनले पनि खेल्ने अवसर पाउनेछिन् । जसको कारण उनले आफूलाई थप निखार्न अनुभव मिल्नेछ । कोयीलाई ट्यालेन्ट हन्टमा महिलातर्फ बाट सम्भावित उत्कृष्ट खेलाडीको रुपमा हेरिएको प्रशिक्षक राइले बताए । ट्यालेन्ट हन्टका अन्य सम्भावित विद्यार्थी खेलाडिहरुलाइ बास्केटबल संघले विभिन्न कलेजहरुमा छात्रवृत्तिका लागि सिफारिस गर्नेछ ।