विराटनगरः मोरङको सुन्दरहरैचा नगरपालिकाको एक विद्यालयका लेखापाल शौचालयमा जलिरहेको अवस्थामा फेला परेका छन् । शरीरमा दन्किएको आगोले पोलेर पीडाले चिच्याइरहेको अवस्थामा देखेपछि स्थानीयले प्रहरीलाई खबर गरेका थिए ।
शनिबार बिहान सुन्दरहरैंचा नगरपालिका-२ मृगौलियास्थित श्री माध्यमिक विद्यालयका लेखापाल शौचालयमा जलिरहेको अवस्थामा भेटिएका हुन् ।
मोरङ प्रहरीका प्रवक्ता डीएसपी रन्जनकुमार दाहालले मृगौलिया घर भएका ४० वर्षीय मनिल ढकाल विद्यालयकै शौचालयभित्र जलिरहेको अवस्थामा शनिबार बिहान ६ः ५० बजेतिर भेटिएका हुन् । बिहानै विद्यालय जान्छु भनेर घरबाट हिँडेको र आगोले शरीरका अधिकांश भाग जलेका कारण उनको अवस्था गम्भीर रहेको प्रहरीले जनाएको छ ।
गम्भीर अवस्थाका ढकाललाई उपचारका लागि विराटनगरको कोशी अस्पताल लगिएको छ । घटनाको प्रारम्भिक अनुसन्धानका क्रममा उनने आफैंलाई आगो लगाएको देखिएको प्रहरीले बताएको छ ।
तत्काल घटनास्थल पुगेको प्रहरी र स्थानीयले शौचालयबाट उद्धार गरेर शरीरमा बलिरहेको आगो निभाइएको प्रहरीले जनाएको छ । आगोले शरीरका अधिकांश भाग जलेको प्रहरीले जनाएको छ । घटनास्थलबाट चिफ नामक किटनासक विषादीको बट्टा र पेट्रोलको गन्ध आउने दुईवटा बोतल प्रहरीले फेला परेको छ । घटनास्थलमा भेटिएका बोतलबाट पेट्रोल चुहिरहेको थियो ।
ढकालले प्रयोग गर्दै आएको प्रदेश १–०२–०४३ प २४४९ नम्बरको मोटरसाइकल शौचालयनजिकै फेला परेको प्रहरीले जनाएको छ । विद्यालयको लेखा परीक्षण शनिबार नै राखिएको र यस्तो घटना हुन पुगेको प्रहरीले जनाएको छ ।