धरानः धरानस्थित बीपी कोइराला स्वास्थ्य बिज्ञान प्रतिष्ठानमा सम्पन्न भइरहेको अव्युदय स्पोर्ट्स फेस्ट २०२३ अन्तर्गत इन्टर ब्याच बास्केटबल प्रतियोगितामा डाक्टर्स महिला र पुरुष दुवै टिमले उपाधि चुमेका छन् ।
फाइनल खेलमा महिलातर्फ डाक्टर्स टिमले आयोजक अव्युदय थर्ड इयर टिमलाई २०–४ र पुरुष तर्फ डाक्टर्स टिमले आयोजक अव्युदयलाइ नै ४७–२० अङ्कको अन्तरले पराजित गर्दै उपाधी चुमेका हुन् । फाइनल खेलमा सहज जित निकालेका डाक्टर्स टिमले महिला तर्फको खेलमा डाक्टर्स र अव्युदयले प्रत्यके क्वाटरमा ४–०, ६–०, ८–२ र २–२ अङ्क जोडेका थिए । यसैगरी पुरुषतर्फ डाक्टर्स र अव्युदयले ११–३, १८–३, १०–५ र ८–९ अङ्क जोडे ।
खेलमा महिला तर्फ डाक्टर्स टिमका डा. आशा राइले ब्यक्तिगत १८ अङ्क जोडे भने पुरुष तर्फ डाक्टर्स टिमका डा. अभिनव खम्बुले १६ अङ्क जोडे । बिजेताहरुलाई अव्युदय स्पोर्ट्स फेस्ट २०२३ को समापन कार्यक्रममा पुरस्कार बितरण गरिने बास्केटबल प्रतियोगिता संयोजक हार्दिक गोयलले जानकारी गराए ।
थर्ड इयर अव्युदयको आयोजनामा भइरहेको स्पोर्ट्स फेस्ट २०२३ अन्तर्गत क्रीकेट, फुट्बल, भलिबल, टेबलटेनिस, चेस, पावरलिफ्टिङ्ग, रिले रेस, क्यारम्बोर्ड , अनलाइन गेम पबजी , सिओडी र फिफा गेम भइरहेको छ । बास्केटबलमा महिला र पुरुष तर्फ ६द्द६ टिमले सहभागिता जनाएको थियो । धरान बास्केटबल संघको प्राविधिक सहयोगमा सम्पन्न बास्केटबल प्रतियोगिताको सम्पूर्ण खेल प्रतिष्ठानको बास्केटबल कोर्टमा सपन्न भएको थियो ।