धरानः धरान–१० स्थित मेरिल्याण्ड इङ्लीस बोर्डिङ स्कुलका विद्यार्थीले धरान उपमहानगरपालिकाका मेयर हर्कराज राई साम्पाङले चलाएको कोकाह खानेपानी अभियानलाई सहयोग गरेका छन् ।
उनीहरुले २२ हजार रुपैयाँ प्रोजेक्ट म्यानेजर दत्तकुमार लिम्बूलाई हस्तान्तरण गरेका हुन् । उनीहरुले १६.५ किलोमिटर हिँड्दै धरानको पर्यटकीयस्थल चिण्डेडाँडा पुगेर सन्देश पनि छरेको भाइस प्रिन्सिपल मनोज राई नाम्दुङले जानकारी दिए । उनीहरुले त्यहाँ सरसफाइ कार्यक्रम पनि गरेका थिए । चिण्डडाँडा वरपर फालिएका प्लास्टिकका बोतल, फोहोर व्यवस्थापन गरी सन्देश दिएको उनले जानकारी दिए । धरानको विभिन्न सामाजिक काममा सधैं साथ दिइरहेको विद्यार्थीको क्लब ‘द बिकन’ मार्फत् यस्तो सन्देश दिइएको हो ।
क्लब २०७२ सालमा स्थापना भएको हो र हालसम्म लगभग ३० लाख रुपैयाँभन्दा बढीको च्यारेटी गरिसकेको उनले जानकारी दिए । संस्थाले अशक्त, विपन्न, असहाय, वृद्धवृद्धा, बाढी, भुकम्पपीडित, रोगीलगायतका आवश्यकता परेकाहरुलाई सहयोग गर्दै आएको उनले जानकारी दिए । यति मात्र नभएर क्लबले पर्यावरण संरक्षण, वातावरण संरक्षण तथा सरसफाइ , प्लास्टिक फ्रि लगायतका कुरामा पनि जोड दिँदै आइरहेको छ ।
‘आगामी दिनमा पनि यसरी नै सामाजिक कार्यहरूमा सहभागी हुनेछौं’, सहायक प्रिन्सिपल राईले भने, ‘सामाजिक कार्यमा बाल बालबालिकालाई संलग्न गराइएमा उनीहरुले त्यो बाटो फलो गर्छ र भोलीको समाजमा हामी उनीहरु नै निर्माण कार्यमा जुट्छ र असल समाजको उदाहरण पाउन सक्छौ, त्यसैले सामाजिकरण गर्दै उनीहरुलाई व्यावहारिक शिक्षा दिने उद्देश्यले पनि र समाज परिवर्तनको लागि पनि हामी सधैं एक कदम अघि बढ्ने छौं ।’