धरानः धरान उपमहानगरपालिकामा डेंगु भाइरस नियन्त्रणका लागि सबै स्कुलको पठनपाठन बन्द गरिएको छ ।
पठनपाठन बन्द भएसँगै फुर्सदिला विद्यार्थी बिहानैदेखि डेगु नियन्त्रणका लागि लागिपरेका छन् । बिहानैदेखि विद्यार्थी घरघरमा पुगेका छन् । विद्यार्थीसँगै शिक्षक, विभिन्न संघसंस्थाका प्रतिनिधि, टिएलओहरु पनि खटे ।
कार्यपालिका बैठकको निर्णयबाट डेंगु नियन्त्रणका लागि अभियान चलाउन विद्यालय बन्द गरिनुका साथै सबै धरानबासी एकसाथ ओर्लिने निर्णय भएको थियो ।
प्रत्येक वडाका जनप्रतिनिधि पनि बुधबार घरघरमा पुगेका छन् । उपमहानगरपालिकाले शिक्षक र विद्यार्थीसँगै सबै वडामा सामाजिक संघसंस्था, टोल विकास समिति, स्थानीय समुदाय एकसाथ आ–आफ्नो वडाको टोलटोलमा खटिन अनुरोध गरेको थियो ।
मेयर हर्कराज राई साम्पाङ, पूर्व मेयर तिलक राई, वडाध्यक्ष प्रविन राई धरान–१८ मै बिहानभरी खटे । कार्यक्रममा बोल्दै मेयर साम्पाङले डेंगु नियन्त्रणका लागि सबै खटेर मात्रै नहुने बताउँदै जनता नै यसका लागि सचेत हुनुपर्ने बताए । लामखुट्टेको फुल, लार्भा र प्युपा नै नष्ट नगरेसम्म डेंगी नियन्त्रण नहुने उनले बताए । उनले प्रत्येक एक दिनमा गमला, पानी ट्याङ्की, टायर, भाँडाकुडामा जम्मा भएको पानी फेरिरहन आग्रह समेत गरे । यस्तै, दिउँसो २ बजेदेखि अन्य वडामा छिर्ने कार्यक्रम रहेको मेयर साम्पाङले जानकारी दिए ।
धरानमा डेंगीबाट हालसम्म आठजनाको मृत्यु भइसकेको छ । निजी क्लिनिक, बीपी कोइराला स्वास्थ्य विज्ञान प्रतिष्ठानलगायतमा डेंगीका बिरामीले चाप छ ।