धरानः धरानको संगीत क्षेत्र तथा संगीतकर्मीहरुको हक–हित तथा उत्थानको लागि १० वर्ष अगाडि खोलिएको एकमात्र संस्था धरान संगीत प्रतिष्ठानको धरान–२ स्थित सार्वजनिक पुस्तकालयको माथिल्लो तलामा रहेको नयाँ कार्यालयको उदघाटन गरिएको छ ।
कार्यक्रममा धरान उपमहानगरपालिकाका मेयर तथा धरान संगीत प्रतिष्ठानका संरक्षक हर्कराज राई साम्पाङले रिवन काटेर प्रतिष्ठानको कार्यालय उदघाटन गरेका थिए । प्रतिष्ठानले नयाँ भवन निर्माण नगरेसम्मका लागि उपमहानगरपालिकाले उपलब्ध गराएको प्रतिष्ठान चाँडै उपयुक्त जग्गा खोजेर नयाँ भवन बनाएर सर्ने प्रतिष्ठानका अध्यक्ष रमेश राईले बताए । जग्गा भेटिएमा प्रतिष्ठानको भवनसँगै वरिष्ठ गायक दीप श्रेष्ठ ट्रष्ट समेत सञ्चालन गर्ने योजना रहेको अध्यक्ष राईले बताए ।
बजेट निर्माण गर्ने बेलामा केन्द्रदेखि स्थानीय स्तरसम्मको सरकारबाट अपहेलित कला, साहित्य र संगीत क्षेत्र रहेको बताउँदै मेयर साम्पाङले पनि प्रतिष्ठानको आफ्नै स्वामित्वको भवन बनाउनुपर्ने र यसको लागि आफ्नो तर्फबाट हुनसक्ने सहयोग गर्ने बताए । प्रतिष्ठानको लागि खुल्ला स्थान रहेको भवनको आवश्यकता रहेको उनले बताए । त्यस्तै।, प्रतिष्ठानको संस्थापक तथा सल्लाहकार अजय राईले गीत, संगीतमा लाग्न चाहनेहरु र यस क्षेत्रमा लागेका श्रष्टाहरुको लागि आफूहरुले जन्माएको प्रतिष्ठान जन्माएको प्रतिष्ठानको आफ्नै भवन निर्माणको लागि जग्गा व्यवस्थापन हुन सकेमा भवन बनाउन आवश्यक आर्थिक सहयोग उठाउन तयार रहेको बताए । त्यस्तै, चाँडै नै क्यानाडा जान लागेका चर्चित गायक एपी शेर्पाको विदाइ पनि गरिएको थियो ।
उनलाई मेयर साम्पाङले प्रतिष्ठानको तर्फबाट मायाको चिनो प्रदानसँगै नेपाली ढाकाटोपी लगाइदिएका थिए भने गीतकार मीना सिंगकले सिलाम साक्ला प्रदान गरेकी थिइन् । त्यस्तै, सिल्भर इन्टरटेनमेन्टका प्रबन्ध निर्देशक सौरभ श्रेष्ठले मायाको चिनो प्रदान गरेका थिए । पारिवारिक पिआरमा क्यानाडा जान लागेका गायक एपी केही वर्षको लागि क्यानाडा जान लागेको र भविश्यमा नेपाल नै फर्किने बताउँदै यदि प्रतिष्ठानको भवन निर्माण हुने भएमा आफ्नो तर्फबाट रु १ लाख सहयोग गर्ने र अन्य सहयोग उठाउन पनि सहयोग गर्ने बताए । उनले गरौं संकल्प बोलको आफ्नो राष्ट्रिय गीत समेत गाएर सुनाएका थिए ।
असारमा विश्व संगीत दिवसको अवसरमा आयोजित कार्यक्रमको हिसाब समेत सोही कार्यक्रममा सार्वजनिक गरिएको थियो । सम्मान तथा सांगीतिक कार्यक्रममा ४ लाख ७५ हजार ८ सय आम्दानी भएको र ५ लाख ३५ हजार ८ सय ३० रुपैयाँ खर्च भएको प्रतिष्ठानले जानकारी दिएको छ ।
विभिन्न दाताहरु तथा संस्थाहरुबाट केही रकम उठ्न बाँकी रहेको र नयाँ कार्यलय भवन व्यवस्थापनको लागि बिजुली, रंगरोगन, फर्निचर लगायतमा १ लाख ८ हजार ५५ खर्च भएको जनाइएको छ । कार्यक्रममा धरान संगीत प्रतिष्ठानका सल्लाहकार तथा एसपी भीम दाहाल र डा.खालिद हुसैन हक पनि अतिथिको रुपमा रहेका थिए भने धरानका संगीतकर्मीहरुको उपस्थिति रहेको थियो ।