धरानः धरानमा एक अनौठो घटना घटेको छ । एक युवा कहिले कारमा त कहिले चल्तीका मोटरसाइकलमा चढेर आउने गर्दथे र मोबाइल फोन प्ले गरिदिन्छु भन्दै मदिरा लिएर सुइँकुच्चा ठोक्ने गर्दथे । उनी मंगलबार मदिरा व्यवसायीकै फन्दामा परेका हुन् । निकै आजित बनेका धेरै व्यवसायीले भने उनलाई समातेर प्रहरीकहाँ बुझाएका छन् । उनी कारमा सवार भएर धरानका विभिन्न पसलबाट ब्रान्डेड मदिरा माग्ने र ‘मोबाइल फोन पे’ गरिदिएको छु भन्दै हिँड्ने गरेका थिए ।
पक्राउ पर्नेमा धरान–१९ का विकास साह रहेको इलाका प्रहरी कार्यालय धरानका डिएसपी नवराज मल्लले जानकारी दिए । उनको साथबाट संस्कृति, पर्यटन तथा नागरिक उड्डयन मन्त्रालय मातहतको नेपाल पर्यटन बोर्डको शाखा अधिकृतको परिचय पत्र पनि फेला परेसँगै ७ दिनको म्याद थप गरेर थप अनुसन्धान अघि बढाइएको उनले जानकारी दिए ।
मनकामना कोल्ड स्टोरका सञ्चालक रमेश हतुवालीले यसअघि पनि पटक पटक धेरै व्यवसायीलाई त्यसै गरेको र आफ्नो पसलमा पनि ३६ सयको मदिरा किनेर सुइँकुच्चा ठोकेको बताए ।
धरानका फरक फरक मदिरा पसलमा उनले आफूलाई पर्यटन मन्त्रालयको शाखा अधिकृत र बीपी प्रतिष्ठानको डाक्टर हुँ भन्ने गरेका पाइएको छ । कारमा सवार हुने उनले दर्जनौं व्यवसायीलाई ठग्नुका साथै ब्रान्डेड मदिरा चोरेर हैरान पारेका अनुसन्धानबाट खुलेको प्रहरीले जनाएको छ ।
उनले केही दिनयता धरानका मदिरा पसलहरूमा ‘मोबाइल पे गर्छु’ भन्दै ब्राण्डेड रक्सी लिएर भाग्ने गरेका व्यवसायीले बताएका छन् । भानुचोकबाट पक्राउ परेका उनले मदिरा पसलका मालिकहरू नभएको मौकामा रक्सी किन्ने बहाना गर्दै चोरेर हिँड्ने गरेको हतुवालीले बताए ।
उनले बीपी प्रतिष्ठानस्थित निर्भाना कन्ट्री क्लबबाट ब्याक लेबल लिएर हिँडेका मात्रै थिएनन् सोमबार धरानस्थित भानुचौकमा पुगेर मदिरा किनिदिनुहोस् भन्दै हिँडेका थिए । मंगलबार चोरीको मदिरा बेच्न फेरि पुगेपछि प्रहरीको जिम्मा लगाइएको बाबा कोल्ड ड्रिङ्क्सका मालिक श्रवण गुप्ताले बताए ।