धरानः डिपो स्कुलको आयोजनामा शुक्रबारदेखि शुरु हुन लागेको १८ औं ललित–अम्बर डिपो कपको तयारी पूरा भएको छ ।
मंसिर १५ देखि २२ गतेसम्म सम्पन्न हुने डिपो कपको उदघाटनमा आयोजक डिपो स्कुल र हिमशिखर स्कुल तरहराले प्रतिस्पर्धा गर्नेछन् । सुनसरी जिल्लास्तरीय प्रतियोगिताको १८ औं संस्करणमा धरानका १२ र धरान बाहिरका ४ विद्यालयले सहभागिता जनाउनेछन् । सहभागी विद्यालयहरुमा धरानबाट आयोजक डिपो, कार्मेल स्कुल, नेपाल पुलिस, एक्वा सेकेन्डरी, माउन्ट हर्मन, दिल्ली पब्लिक, विष्णु मेमोरियल, देउराली चिल्ड्रेन, हिविकस, मेरिल्याण्ड, प्रभात र समिट स्कुलले सहभागिता जनाएको आयोजकले जनाएको छ । यसैगरी धरान बाहिरबाट हिमशिखर तरहरा, मर्निङ स्टार भरौल, बराह राइजिङ स्टार र लर्ड बुद्ध स्कुल रामधुनीबाट सहभागिता जनाउने आयोजकले जनाएको छ ।
प्रतियोगिताका बिजेताले नगद ११ हजार १ सय ११ रुपैयाँ, उपविजेताले ७ हजार १ सय ११ र तेस्रो हुनेले ५ हजार १ सय ११ रुपैयाँ, ट्रफी, मेडल र प्रमाणपत्र प्राप्त गर्नेछन् । यसैगरी प्रतियोगिताको उत्कुष्ट खेलाडी, हाइस्कोरर र प्रत्येक खेलका म्यान अफ द म्याचले ट्रफी र प्रमाणपत्र प्राप्त गर्नेछन् ।
यसैगरी दिलबहादुर प्लेट च्याम्पियनका बिजेताले नगद ३ हजार १ सय ११ रुपैयाँ र उपविजेताले २ हजार १ सय ११ रुपैयाँ प्राप्त गर्नेछ । डिपो कपको पहिलो चरणमा पराजित टिमले दिल बहादुर प्लेट च्याम्पियन प्रतियोगिता खेल्नेछ । प्रतियोगिताको सम्पूर्ण खेल डिपो स्कुलको खेल मैदानमा सम्पन्न हुने आयोजकले जनाएको छ ।