धरानः अन्ततः धरानमा सर्दु करिडोर बन्ने भएपछि खुशी भएका जनता निराश भएका छन् ।
दुई वर्षभित्र सक्ने लक्ष्यका साथ २०७८ असोज २ गते भीम आचार्य कोशी प्रदेशका मुख्यमन्त्री हुँदा तामझामका साथ उद्घाटन भएको करिडोर अहिले लथालिङ्ग अवस्थामा पुगेको छ ।
२५ करोड ४० लाखको लागत इस्टिमेट र १० करोड ६२ लाख ६१ हजार ४४ रुपैयाँको ठेक्का सम्झौतामा यो परियोजना सञ्चालन नहुँदै तुहिएको जस्तै अवस्थामा पुगेको छ । यो बाँध बाँध्ने मात्रै नभई भविष्यमा असाध्यै आकर्षक, भव्य पर्यटकीयस्थल, भव्य पर्यटकीयस्थलहरु भएको, सडक भएको, त्यसको छेउछाउमा रेष्टुराँहरु, हजारौं पर्यटक राति घुम्न जाने र रमाइलो गर्ने, फर्किनेस्थलको रुपमा विकास गर्ने परिकल्पना अन्तर्गतको शुरुवात भएको परियोजना भनिएपनि अहिले लथालिङ्ग अवस्थामा पुगेको हो ।
धरान–१७ स्थित धरान–चतरा सडक खण्डमा पर्ने पुल नजिकैबाट वालुवामात्रै हालेर बाँध बाँधेर लगिएको र त्यो अहिले सर्दु खोलाले बगाइसकेको छ । त्यहाँ अहिले वालुवामा खन्याएजस्तोमात्रै भएको छैन, बालुवामा खन्याएको पैसा समेत बगाएको छ । अहिले करोडौं लगानी भएपनि लाखौं रुपैयाँ भने खोलाले बगाएको छ ।
हिमालय टोल विकास संस्थाका अध्यक्ष अम्बरबहादुर श्रेष्ठले सर्दु खोलाका कारण बालुवा लगाइएर बाँध निर्माण गरी करिडोरस्थल बगाएपछि ठेकेदारसमेत अहिलेसम्म बेपत्ता भएको बताए । परियोजनाको दुईवर्षभित्र सक्नेगरी ठेक्का लगाइएपनि अहिलेसम्म थोरै मात्र काम भएको छ, बनाइएका संरचना पनि धमाधम सकिँदैछन् ।
धरान–१७ को पुलदेखि पाँच किलोमिटर क्षेत्रमा तटबन्ध गर्ने, जाली, ढुंगासहितको रिमेटमिनवाल लगाइने, १७ सय मिटरमा कंक्रिटको ढलाइ र ढुंगा भरिने, १६ सय ७५ मिटरमा पक्का आरसिसीको रड राखिने भनिएपनि अहिलेसम्म कुनै संरचना गतिलो छैन । भएका संरचना पनि खोलाले बगाइसकेको छ ।
परियोजना बने ७ सय घरधुरीका करिब १४०० घरधुरी लाभान्वित हुने जनाएपनि हालसम्म कोही लाभान्वित नबनेको स्थानीबासीले बताए ।
बहुवर्षे आयोजना सर्दु करिडोरको २०७८ जेठ ८ गते बोलपत्र आहवान भएको थियो । प्रदेश सरकार सरकारले बहुवर्षीय योजनाअन्तर्गत ठेक्का स्वीकृत गरेको र सो अनुसार प्यासिफिक जलजला कम्पनीले सम्झौता गरेर निर्माण थालेको जलस्रोत तथा सिंचाइ विकास कार्यालय सुनसरी डिभिजनले जनाएको छ । यसमा संघीय सरकार र धरान उपमहानगरपालिकाले साझेदारी गर्नेगरी बजेटको व्यवस्था गरेको थियो ।
यस विषयमा धरान उपमहानगरपालिका र वडाध्यक्षले खासै चासो नदेखाएको स्थानीयले बताएका छन् ।