धरानः युएन नवोदय फुटसल च्याम्पियन्स लिगको उपाधि बिबिएस फ्याकल्टीले जितेको छ ।
शुक्रबार सम्पन्न लिगमा फ्याकल्टी लिगबाट उत्कृष्ट १५ टिम सहभागी थिए।च्याम्पियन्स लिगमा बि.एच.एम.लाई ३–१ गोलअन्तरले पराजित गर्दै बि.बि.एस.ले उपाधि आफ्नो पोल्टामा पारेको हो । बि.बि.एस.को जितका लागि फाइनल खेलका म्यान अफ द म्याच निकल राईको उत्कृष्ट २ गोल र सुलभ श्रेष्ठको १ गोल सहायक बन्यो । उपविजेता बि.एच.एम.का तर्फबाट शान लिम्बूले सान्त्वना गोल गरे ।
धरान–१६ स्थित बिबि फुटसलमा भएको फुटसल च्याम्पियन्स लिगका विजेता र उपविजेता टिमलाई कोशी प्रदेश फुटबल संघका उपाध्यक्ष कविराज तुम्बापो र युएन नवोदय कलेजका क्याम्पस प्रमुख डम्बरकुमार तुम्बापो, कलेजका होटल म्यानेजमेन्ट कोअर्डिनेटर गगनमान श्रेष्ठ, पि.आर.ओ. रामबहादुर लिम्बू, अध्यापकहरु विष्णु दाहाल, नुर खान, प्रोमोटर जगत नेम्वाङलगायतले ट्रफी, मेडल र प्रमाणपत्र प्रदान गरेका थिए ।
च्याम्पियन्स लिग अघि फ्याकल्टी लिग विजेताहरु कक्षा ११ का तर्फबाट विजयी कक्षा ११ ए र कक्षा १२ बाट कक्षा १२ एफलाई ट्रफी र मेडल प्रदान गरिएको थियो । त्यस्तै, ब्याचलर लिग च्याम्पियन बनेको बिबिएसलाई समेत ट्रफी र मेडल प्रदान गरिएको थियो ।
फाइनल खेलका उत्कृष्ट गोल किपर बिबिएसका सुलभ राई, टप स्कोरर बिबिएसकै दीपेन्द्र बस्नेत, बेस्ट प्लेयर अफ द लिग बिबिएसका कप्तान विश्वास मगर घोषित भए ।