धरानः धरान–१६ स्थित युएन, नवोदय कलेजको १२ औं वार्षिकोत्सव शनिबार विविध कार्यक्रमका साथ सम्पन्न भएको छ ।
धरान–१५ स्थित चुम्लुङहीममा भएको कार्यक्रममा नेपाल थर्ड टपर, प्रदेश थर्ड टपर र विभिन्न विधामा उत्कृष्ट विद्यार्थीहरुलाई सम्मान गरिएको थियो । त्रिभुवन विश्वविद्यालयले लिएको बिएचएम दोश्रो सेमेष्टरको परीक्षामा नेपाल थर्ड हुने स्मारिका श्रेष्ठलाई नगद ३० हजार र सम्मानपत्रले सम्मान गरिएको छ । स्मारिकाले जिपिए ३ दसमलव ९६ ल्याएकी थिइन् ।
त्यस्तै, बिएचएम दोश्रो सेमेष्टरको परीक्षामा कोशी प्रदेश थर्ड टपर हुने रोजिना राईलाई १५ हजार नगद र सम्मान पत्रले सम्मान गरिएको थियो । रोजिनाले जिपिए ३ दशमलव ९१ ल्याएकी थिइन् । सम्मानित हुने छात्राहरुलाई कार्यक्रमका प्रमुख अतिथि राष्ट्रिय परीक्षा बोर्ड (एनइबी) कोशी प्रदेशका निर्देशक जीवन गड्तौला, कलेजका म्यानेजिङ डाइरेक्टर ज्ञानेश्वर झा, क्याम्पस प्रमुख, प्रिन्सिपल डम्बरकुमार तुम्वापोले सम्मान गरेका थिए ।
कलेजको बेस्ट स्टुडेन्ट अफ द यियर, बेस्ट डिसिप्लिन स्टुडेन्ट अफ द यियर लगायत विभिन्न विधामा उत्कृष्ट विद्यार्थीहरुलाई पुरस्कारसहित सम्मान गरिएको थियो ।
यसैबीच कलेजको कक्षा–१२ को अध्ययन पूरा गरेर परीक्षाको तयारी गरिरहेका विद्यार्थीहरुलाई बिदाई गरिएको छ । कलेजका म्यानेजिङ डाइरेक्टर झा, प्रिन्सिपल तुम्बापो, होटल म्यानेजमेन्ट कोअर्डिनेटर गगनमान श्रेष्ठ, पब्लिक रिलेसन अफिसर रामबहादुर लिम्बूलगायतले मायाको चिनो प्रदान गर्नुका साथै अविर र खदा लगाएर बिदाई गरे ।
कार्यक्रमका प्रमुख अतिथि एनइबीका निर्देशक गड्तौलाले युएन, नवोदय कलेज प्रदेशकै नमूना कलेज भएको बताउँदै कक्षा–१२ का बिद्यार्थीहरुलाई शुभकामना दिए । कलेजका निर्देशक ज्ञानेश्वर झाले युएन, नवोदय कलेजले गुणस्तरीय शिक्षा प्रदान गर्दै आएको बताए । कलेजका प्रमुख, प्रिन्सिपल डम्बरकुमार तुम्बापोले कक्षा–१२ को वार्षिक परीक्षामा मिहिनेतका साथ अध्ययन गरेर उत्कृष्ट अंक ल्याई कलेजको नाम राख्न सम्पूर्ण विद्यार्थीहरुलाई आग्रह गरे ।
कक्षा–१२ को बार्षिक परीक्षा आगामी २०८१ साल बैशाख –१४ गतेबाट शुरु हुँदैछ । कार्यक्रममा विद्यार्थीहरुले आकर्षक गीत र नृत्य प्रस्तुत गरी मनोरञ्जन दिलाएका थिए ।