धरानः धरान–१२ चतरालाइनस्थित सुनाखरी एकेडमीले विभिन्न विधामा उत्कृष्ट भएका विद्यार्थीहरुलाई सम्मान गरेको छ ।
स्कुलको प्राङ्गणमा एक कार्यक्रमको आयोजना गरी स्कुलले सम्मान गरेको हो । गत ज्येष्ठ ३१ देखि असार १ गतेसम्म धरानमा भएको बीपी मेमोरियल महिला राष्ट्रिय कराँते प्रतियोगितामा सुनाखरीकी छात्रा निमा डोल्मा तामाङले २ स्वर्ण, १ रजत पदक र उत्कृष्ट फाइटरको उपाधिसहित नगद ८ हजार रुपैयाँ प्राप्त गरेकी थिइन् ।
त्यस्तै, गत ज्येष्ठ ३० र ३१ गते पोखरामा भएको १५ वर्ष मुनिका राष्ट्रिय टेबलटेनिस प्रतियोगितामा सुलेखा ठाकुरले १ रजत र १ कास्य पदक हासिल गरेकी थिइन् । यसैगरी सुनाखरीकै अर्का छात्र अनिष राईले फक्ताङ्लुङ मिडिया हाउस प्रा.लि. ले धरानमा आयोजना गरेको एसईई आइडल–२०२४ को गायनतर्फ फष्ट रनर अपको उपाधिसहित ३० हजार रुपैयाँ नगद, ट्रफी र प्रमाणपत्र प्राप्त गरेका थिए ।
यसैगरी गरिमा डान्स सेन्टर धरानले गत शनिबार आयोजना गरेको चिल्ड्रेन ट्यालेन्ट हन्टमा सुनाखरीकी छात्रा आयुषा राईले मस्ट चार्मिङ फेसको सब टाइटलसहित तेश्रो बनेकी थिइन् । आयुषाले १५ हजार नगद पुरस्कार प्राप्त गरेकी थिइन् । सुनाखरीकै तनुजा लिम्बूले मस्ट फ्रेन्डसीप, एबिका लिम्बूले मस्ट डिसिप्लिन र सोफिया राईले मस्ट एक्टिभको उपाधि हासिल गरेकी थिइन् ।
विभिन्न उपाधि हासिल गरेका विद्यार्थीहरुलाई स्कुलका प्रिन्सिपल मिलनकुमार राई, निर्देशक प्रदीप राई र प्लस टु कोअर्डिनेटर टपकुमार राईले अविर र खदा लगाएर सम्मान गरेका थिए । यसै अवसरमा स्कुलले कराते प्रशिक्षक किरण लामा र टेबलटेनिसकी प्रशिक्षक गीता थापालाई समेत सम्मान गरेको छ । विद्यार्थीहरुको मनोबल बढाउँदै हौसला प्रदान गर्न सम्मान गरिएको प्रिन्सिपल राईले बताए ।