धरानः विश्वमा नै युवाहरु माझ लोकप्रिय बन्दै गएको फाइट गेम एमएमए (मिक्स मार्सल आर्ट) खेल धरानमा पनि शुरु हुने भएको छ ।
धरानमा यही असारदेखि वरियर्स डेन ट्रेनिङ्ग सेन्टरले धनकुटे रोडस्थित बुढासुब्बा फुटसलको हलमा एमएमए फाइटको प्रशिक्षण शुरु गर्न लागेका हुन् । काठमाण्डौं र पोखरा गरी तीन स्थानमा मात्र प्रशिक्षण हुने एमएमए फाइट प्रशिक्षण कोशी प्रदेशभरि धरानमा यो पहिलो हो । वरियर्स डेन युवा नेता सन्तोष विक र एमएमए खेलाडी एलिस लिम्बूले सञ्चालन गर्न लागेका हुन् ।
व्यवसायिकरुपमा खोल्न अघि वरियर्सले यही असार १६ गतेदेखि २२ गतेसम्म एकहप्ते एमएमए सेमिनारको आयोजना गरेका छन् । एमएमए फाइट खेलको प्रर्वद्धन तथा आधारभूत प्रशिक्षण दिनका लागि एकहप्ते एमएमए फाइट सेमिनारको आयोजना गरिएको वरिवर्स डेनका सञ्चालक एवं एमएमए खेलाडी एलिस लिम्बूले जानकारी गराए । एक हप्तासम्म चलेको सेमिनार तथा प्रशिक्षणमा सहभागी विद्यार्थीहरुलाई युकेबाट आएका एमएमए फाइटका प्रोफेसनल खेलाडी रिर्चड मर्सन र एलिस लिम्बूले प्रशिक्षण दिएका थिए ।
सेमिनारमा धरान आदर्श, केके स्कुल र डिपि विलिभर्स स्कुलका विद्यार्थीहरुले सहभागिता जनाएका थिए । उनीहरुलाई एमएमए फाइट प्रशिक्षणसँगै सहभागीहरुलाई एमएमए खेलको विषयमा जानकारी समेत गराइएको सञ्चालक सन्तोष विकले जानकारी दिए ।
एमएमए फाइट भन्ने वित्तिक्कै अलि एग्रेसिभ र फरक खेलको रुपमा बुझ्ने गरेको पाइन्छ । तर यो विल्कुलै अन्य खेलकुद जस्तै सामान्य खेल नै हो । यो फाइट आर्ट हो । यस खेलले अनुशासन, हार्डवर्क, फिटनेस र सेल्फ डिफेन्स सिकाउने प्रशिक्षक एलिस लिम्बूले बताए । लिम्बूले भने, ‘एमएमए प्रशिक्षणमा सहभागी विद्यार्थीहलाई तीन विद्या सिकाउँछौ । पहिलो कसरि सेल्फ डिफेन्स गर्ने व्राजिलियन फिजित्सु आर्ट, दोस्रो कसरी लडाउने भनेर रेस्लिङ आर्ट र कसरी डिफेन्स गर्दै प्रहार गर्ने कला स्ट्राइकिङ आर्ट सिकाउँछौ । विभिन्न फाइट आर्टहरुको मिश्रण रहेको खेल एमएमए फाइट आर्ट अमेरिकाबाट बुरु भएको हो । अहिले विश्वमा नै लोकप्रिय र व्यावसायिकरुपमा यो खेल सफल बन्दै गइरहेको लिम्बूले बताए । लिम्बू आफै पनि केही महिनापछि माल्दिभ्समा हुन लागेको एमएमए फाइटमा वरियर्स डेनबाट नेपालको प्रतिनिधित्व गर्दै खेल्न जान लागेका छन् ।