सुनसरीभरका स्कुल बिदा
धरानः शिक्षासेवी, निजी तथा आवासीय विद्यालय अर्गनाइजेशन नेपाल (प्याब्सन) का सुनसरी अध्यक्ष अनुप योन्जनको अल्पायुमै निधन भएको छ ।
हृदयघातका कारण शुक्रबार बिहान ४८ वर्षको अल्पायुमै उनको निधन भएको पारिवारिक स्रोतले जनाएको छ । धरान-८ कविर टोलस्थित घरमा हृदयघात हुने वित्तिकै उपचारका लागि धरानस्थित बीपी प्रतिष्ठान लगिएको थियो ।
एक्कासी छाती दुखेको भनी परिवारलाई जानकारी दिने वित्तिकै उनलाई शुक्रबार बिहान २ बजे प्रतिष्ठान भर्ना गरिएको थियो । प्रतिष्ठानमै उपचारका क्रममा २ः३० बजे चिकित्सकले मृत घोषणा गरेको पारिवारिक स्रोतले जनाएको छ ।
धरान-१८ स्थित माउन्ट हर्मन एकेडेमीका संस्थापक निर्देशक, प्रिन्सिपल तथा धरान–१२ स्थित एम्स एकेडेमीका निर्देशक उनी नेपाल स्काउटका धरान नगर प्रमुख आयुक्त तथा धरान रिडर्सका संयोजक समेत रहेका थिए ।
उनको एक छोरा र एक छोरी छन् । उनको शुक्रबार नै धरान-८ स्थित बौद्ध दाहसंस्कारस्थलमा अन्त्येष्टी गरिने कार्यक्रम रहेको पारिवारिक स्रोतले जनाएको छ ।
यसैबीच असामयिक निधनप्रति दुःख व्यक्त गर्दै सुनसरी जिल्लाभरिका निजी विद्यालयहरूमा शोक विदास्वरुप एकदिन शोकबिदा दिने निर्णय भएको छ । शुक्रबार हुने भनिएका सम्पूर्ण परीक्षाहरु भोलि शनिबार विद्यालय समयमा हुने जानकारी समेत जनाइएको छ ।
शिक्षासेवा, समाजसेवा गरिरहुँ भन्ने हुटहुटी बोकेका, सरल, मिजासिलो स्वभाव, कसैलाई भनी नबिझाउने स्वभावका आदरणीय अनुप सरप्रति भावपूर्ण हार्दिक श्रद्धान्जली ।