धरानः धरानका मेयर हर्कराज साम्पाङलाइ कारवाहीको माग गर्दै सुनसरीका पत्रकारहरूले मौन जुलुस प्रदर्शन गरेका छन् ।
मेयर साम्पाङले सामाजिक सञ्जालमा लेख्दै धम्की दिएको भन्दै उनीहरूले मौन जुलुस निकालेका हुन् । भानुचोकबाट शुरु भएको जुलुस धरान उपमहानगरपालिकाको गेटमा पुगेर कोणसभामा परिणत भएको थियो । कोणसभामा बोल्दै अग्रज पत्रकार हर्ष सुब्बाले गणतन्त्रमा पनि पत्रकार असुरक्षितमा हुँदै आएको बताउँदै प्रेस तथा अभिव्यक्ति स्वतन्त्रताको ग्यारेन्टी स्थानीय सरकारले गर्नुपर्नेमा उल्टै धाकधम्की दिनु गलत भएको बताए ।
यसअघि मेयर साम्पाङले पत्रकार महासंघ सुनसरीका अध्यक्ष जनकऋषि राई र गोपाल दाहाललाई समाचारको विषयमा धम्की दिएका थिए ।
यसैबीच साम्पाङका समर्थकले आइतबार राति पनि म्यासेज दाहाललाई धम्की दिएको उनले जानकारी दिएका छन् । म्यासेजमा ‘तेरो दिन धेरै छैन’ भनेर धम्क्याइएको उनले जानकारी दिए । धरानका मेयरले विकास गरिरहेको र उनको कामका विरुद्ध लेखेको भन्ने आशयले म्यासेज गरिएको छ । मेसेजमा ‘जन्मभूमिलाई सफा सुन्दर हेर्ने चाहना’ रहेको जनाउँदै ‘राम्रो काम गर्नेलाई राम्रो गर्न’ नदिएको आरोप लगाइएको छ ।
यसअघि नै पनि यस विषयमा दाहाल र राईले सुरक्षाको माग गर्दै जिल्ला प्रहरी कार्यालयमा निवेदन दिइसकेका छन् ।