धरानः धरान उपमहानगरपालिकामा लिम्बू भाषालाई सरकारी कामकाजको भाषा बनाउन माग गर्दै ज्ञापनपत्र बुझाइएको छ ।
उपमहानगरपालिकाका कार्यवाहक मेयर अइन्द्रविक्रम बेघालाई ज्ञापनपत्र बुझाइएको हो । याक्थुङ लिम्बू भाषिक सांस्कृतिक नागरिक अभियानले उपमहानगरपालिकामा पुगेर ज्ञापन पत्र बुझाएको नागरिक अभियानका अध्यक्ष राम आङ्बुहाङले जानकारी दिए । उनले अभियानले ज्ञापनपत्र बुझाएर उपमहानगरपालिकालाई भाषा आयोगको सिफारिसको आधारमा याक्थुङ लिम्बू भाषा सरकारी कामकाजको भाषा बनाउन दबाब सिर्जना गरिएको बताए ।
सांस्कृतिक अभियन्ता अमित थेबेले धरानमा याक्थुङ भाषालाई सरकारी कामकाजको भाषा बनाउन पर्याप्त कानुनी तथा जनसाख्यिक आधार रहेको बताउँदै राष्ट्रिय जनगणना २०७८ अनुसार धरानको कुल १ लाख ६६ हजार ५ सय ३१ जनसंख्यामध्ये लिम्बू समुदायको संख्या करिब २१ हजार ६ सय ५० अर्थात् १३.०१ प्रतिशत रहेको बताए । स्थानीय सरकारको दोस्रो सरकारी कामकाजको भाषा बनाउन संवैधानिक र व्यावहारिक आधार रहेको उनको भनाइ छ ।