धरानः श्रम संस्कृति पार्टीका अध्यक्ष एवं प्रतिनिधिसभा सदस्य हर्क साम्पाङ जानकी मन्दिर दर्शन गर्न आउन लागेपछि हिन्दूवादी संगठनले विरोध जनाएका छन् ।
मंगलबार अध्यक्ष साम्पाङ जानकी मन्दिरमा दर्शन गर्न आउन लागेकोमा उनको विरोधमा नाराबाजी गरिएको छ । सम्राट सेना लगायतका हिन्दूवादी संघ संस्थाले ‘जय श्री राम’, ‘हर्क साम्पाङ मुर्दावाद’, ‘हिन्दू विरोधी मुर्दाबाद’ लगायतको नारा लगाउँदै विरोध जनाएपछि प्रहरीहरु र उनीहरुबीच ठेलमठेल भएको हो ।
यता धनुषाका प्रहरी प्रवक्ता प्रहरी नायव उपरीक्षक मधुसुदन न्यौपानेले सुरक्षा व्यवस्था कडा गरिएको बताए ।
यसैबीच पार्टी अध्यक्ष साम्पाङलाई स्वागत गर्न आएका नेता-कार्यकर्तालाई हिन्दू सम्राट सेनाका कार्यकर्ताले खेदाएका छन् ।
साम्पाङ मंगलबार जानकी मन्दिर दर्शनका लागि जनकपुर आउने कार्यक्रम रहेको थियो । सोही क्रममा उनी आउनुअघि स्वागतका लागि पुगेका पार्टीका नेता–कार्यकर्ता खेदाएका हुन् ।
हिन्दू सम्राट सेनाले भने विगतमा गाई काटेर खानुपर्ने अभिव्यक्ति दिएको भन्दै सम्पाङलाई निषेध गर्ने जनाएको छ । हिन्दू सम्राट सेनाले साम्पाङलाई ‘क्रिश्चियन धर्मको प्रचारक’ भएको आरोप लगाउँदै मन्दिर प्रवेश गर्न नदिने पूर्वघोषणा गरेको थियो ।
यस सन्दर्भमा हर्क साम्पाङले फेसबुकमा स्टाटस नै लेखेका छन्, ‘गाई कसले खाएको रैछ ? गाई खानेलाई मन्दिरमा पस्न नदिने भनेको देखें ! यो कसले कस्तो राजनीति गर्न खोजेको रैछ ? जय जानकी मन्दिर !
उनले उहिलेको कुरा अनि धर्मको कुरा लिएर लफडा भएको पनि उल्लेख गरेका छन् । साथै साम्पाङले आफ्ना पार्टी कार्यकर्तालाई संयमित हुन आग्रहसमेत गरेका छन् । पछिल्लो स्टाटसमा साम्पाङले जानकी मन्दिर परिसरमा आफ्ना कार्यकर्तामाथि दुर्व्यवहार भएको दाबी गरेका छन् । उनले लेखेका छन्, ‘जानकी मन्दिर परिसरमा हाम्रा श्रमदाताहरूलाई दुर्व्यवहार भएछ। त्यसैले मन्दिर दर्शन गर्न नसक्ने भइयो आज। कुनै दिन जानकी देवीले दर्शन दिनुहोला ।
जनकपुरमा आज श्रम संस्कृति पार्टीको साधारण सभा तथा पार्टी प्रवेश कार्यक्रम आयोजना गरेको छ ।
हाम्रो कोशी आवाज
