धरानः भान्सामा प्रयोग हुने अति आवश्यक वस्तुको मूल्यमा भएको अत्यधिक मूल्यवृद्धिले आम नेपालीको दैनिक जनजीवन कष्टकर मात्रै होइन, बाँच्नै गाह्रो बनाएको छ ।
भान्सामा नभई नहुने अति आवश्यक खाद्यान्न चामल, दाल, तेल, चिनी, तरकारीदेखि खाना पकाउने ग्याससम्मको अत्यधिक मूल्यवृद्धिपश्चात् थपिएको महँगीको चरम मारले खासगरी निम्न वर्ग र मध्यम वर्गका नेपालीको ढाड नै सेकिएको छ ।
उपभोक्तावादी प्रेमलाल महर्जनले पछिल्लो चार महिनाको बजार तथ्यांक र हालै आएको विनाशकारी बाढीपछिको आपूर्ति अवरोधले गर्दा सर्वसाधारणको क्रयशक्तिमा अहिलेसम्मकै ठूलो प्रभाव पारेको जानकारी दिए । ‘नेपाली जनताले अहिलेजस्तो दैनिक उपभोग्य वस्तुको मूल्यवृद्धिको सामना भूकम्प र कोभिडको समयमा पनि बेहोर्नु परेको थिएन,’ महर्जनले भने, ‘सरकार भनेको आपत-विपदको बेला सहयोग गर्ने हो । बजारमा सरकारको उपस्थिति नहुँदा आपत-विपद परेकै समयमा दैनिक उपभोग्य वस्तुको मूल्य सबैभन्दा माथि पुग्यो ।’
जेठ १ गतेको बजार भाउ र भदौ १५ गतेको मूल्यलाई तुलना गर्दा धेरैजसो अत्यावश्यक वस्तुमा १५ प्रतिशतभन्दा बढीको वृद्धि भइसकेको तथ्यांकले देखाउँछ ।
जेठ महिनाको सुरुवातमा बजार केही स्थिर देखिए पनि १५ दिन नबित्दै महँगीको संकेत देखा परिसकेको थियो ।
असार महिनामा खाद्यान्न र मसला दुवैतर्फ अत्यधिक मूल्यवृद्धि भएको संघको भनाइ छ । जेठ १५ सम्म प्रतिकिलो ९५ रुपैयाँमा पाइने स्टिम जिरा मसिनो चामलको मूल्य असार १ गते नै ५ प्रतिशतले बढेर १०० रुपैयाँ पुगेको थियो ।
त्यही अवधिमा मसलाजन्य वस्तुको मूल्यमा झन् अस्वाभाविक उछाल आएको थियो । जेठसम्म प्रतिकिलो ३५० रुपैयाँमा स्थिर रहेको धनियाँ पाउडर असार १ गते नै ५० रुपैयाँले बढेर ४०० रुपैयाँ पुग्यो भने ५०० रुपैयाँमा पाइने बेसार पाउडरको मूल्य पनि ५ प्रतिशतले बढेर ५२५ रुपैयाँ प्रतिकिलो कायम भएको थियो ।
साउन महिना लागेपछि बजारमा गेडागुडी र दालको मूल्यमा क्रमिक वृद्धि हुँदै साउन १५ सम्म आइपुग्दा चनाको दालमा दुई पटकसम्म मूल्यवृद्धि भएर १७० रुपैयाँ प्रतिकिलो कायम भएको थियो ।
भदौ १५ सम्म आइपुग्दा जिरा मसिनो चामलको मूल्य जेठको तुलनामा १५.७८ प्रतिशतले बढेर ११० रुपैयाँ र चिनीको मूल्य १४.२८ प्रतिशतले बढेर १२० रुपैयाँ पुगिसकेको थियो ।
अर्कोतर्फ तरकारीमा पनि प्रतिकिलो ६० देखि १ सय रुपैयाँसम्म मूल्यवृद्धि हुँदा आम उपभोक्ताको जनजीवन चौतर्फी रूपमा महँगीको मारमा परेको छ ।