काठमाडौंः लकडाउनबारे छलफल गर्न बिहीबार बसेको मन्त्रिपरिषद् बैठक सकिएको छ । बैठकले लकडाउन खुकुलो पार्ने मोडालिटी २ दिनभित्र पेस गर्न कोभिड–१९ रोकथाम तथा नियन्त्रण उच्चस्तरीय समितिलाई जिम्मा दिएको छ ।
समितिले ल्याएको कार्ययोजनापछि पुनः मन्त्रिपरिषद्को बैठक बस्ने र निर्णय गर्ने उद्योग, वाणिज्य तथा आपूर्तिमन्त्री लेखराज भट्टले जानकारी दिए । मन्त्री भट्टले प्रधानमन्त्रीले लकडाउन खुकुलो बनाउने गरी कुन निकाय खुला गर्ने वा कुन निकाय खुला नगर्ने भन्ने विषयमा खाका तयार पार्न निर्देशन दिएको बताए । चैत ११ गतेदेखि देशभर लागू लकडाउन पटकपटक म्याद थप्दै पछिल्लो समय यही जेठ ३२ गतेसम्म लम्ब्याइएको छ ।
लकडाउनको मोडालिटी परिवर्तनबारे प्रधानमन्त्री केपी शर्मा ओलीले बुधबार साँझ विज्ञहरुसँग ५ घण्टा छलफल गरेका थिए। त्यस क्रममा स्वास्थ्यविद्, अर्थविद्, योजनाविद्लगायतले लकडाउनको मोडालिटी परिवर्तन गर्न प्रधानमनत्री ओलीलाई सुझाएका थिए । प्रधानमन्त्री ओली पनि यस विषयमा सकारात्मक देखिएका थिए । सरकारले लकडाउन खुकुलो पार्ने मोडालिटी बनाउने जिम्मेवारी कोरोना रोकथाम तथा नियन्त्रण उच्चस्तरीय समितिलाई दिएको छ ।
बैठकमा कोरोना भाइरसको संक्रमणका कारण नेपालमा परिरहेको प्रभावको विभिन्न पक्षमा छलफल भएको थियो ।