धरानः धरानलगायत देशभर जनता समाजवादी पार्टीले प्रदर्शन गरेको छ ।
जनता समाजवादीका अध्यक्ष ताजुब लिम्बूले धरानस्थित भानुचोकमा भेला भएर प्रदर्शन गरिएको जानकारी दिए । संसदीय समितिबाट पारित नेपालको नागरिकता (पहिलो संशोधन) ऐन २०७७ फिर्ता लिन माग गर्दै प्रदर्शन गरिएको उनले जानकारी दिए । भुपु सैनिक गजेन्द्र इस्वोले हालको नागरिकता विधेयकले गोर्खा भुपुको सन्ततिलाई समेत नराम्रो असर गर्ने बताए । कार्यक्रममा धरानको खानेपानी, रुकुम घटना आदिबारे पनि खबरदारी गरिएको थियो ।
नेपाली पुरुषसँग विवाह गरेर आउने विदेशी महिलालाई ७ वर्षपछि मात्रै अंगीकृत नागरिकता दिने र विदेशी ज्वाईलाई नागरिकता नदिने प्रावधान विरुद्ध प्रदर्शन गरिएको जसपाले जनाएको छ ।
उता काठमाडौंलगायत देशभर नै जसपाले प्रदर्शन गरेको छ । काठमाडौंमा आयोजित कार्यक्रममा जसपाका वरिष्ठ नेता अशोक राई, नेताहरु डा. बाबुराम भट्टराई, शरतसिंह भण्डारी र रेणु यादवले गोर्खा फौजका सन्तानलाई वंशजको नागरिकता दिन माग गरे ।
‘गोर्खा फौजका हाम्रा दाजुभाई दिदीबहिनीहरु र जसलाई पहिलो र दोस्रो विश्वयुद्धमा जबर्जस्ती गोठगोठबाट तानेर, जंगलबाट तानेर जान्न भन्दाभन्दै जबर्जस्ती भर्ती गरेर विदेशी फौजमा पठाइएका हाम्रा गोर्खा सैनिक र उनीहरुका छोराछोरीहरुलाई आज नागरिकताबाट बञ्चित गराउने षड्यन्त्र भइराखेको छ,’ वरिष्ठ नेता राईले भने, ‘बेलायत, भारत र नेपाल सरकारको त्रिपक्षीय सम्झौताअन्तर्गत गोर्खा भर्तीमा गएका नागरिकहरुलाई अनागरिक बनाउने षड्यन्त्र भएको छ । त्यसलाई रोक्न यो विधेयकमा व्यवस्था हुनुपर्छ भन्ने हाम्रो माग छ ।’
पूर्वप्रधानमन्त्री डा. बाबुराम भट्टराईले गोर्खा भर्तीबाट बेलायत, ब्रुनाई, सिंगापुरलगायतका देशमा बसेका नेपालीहरुका सन्तान सम्बन्धित देशमै जन्मिएर उतैको नागरिकता लिने गरेको उल्लेख गर्दै उनीहरुलाई नेपाली नागरिकता लिनबाट बञ्चित गर्न नहुने र वंशजको आधारमा नागरिकता दिनुपर्ने बताए ।
भूपू गोर्खा सैनिकहरुले वंशजका आधारमा आफूहरुले लिएको नेपाली नागरिकतालाई निरन्तरता दिनुपर्ने माग गर्दै आएका थिए ।