धरानः कोभिड १९ को लकडाउनका बीच धरानमा शनिबार अन्तर्राष्ट्रिय सहकारी दिवस स्वास्थ मापदण्ड अपनाएर सुरक्षित तरिकाले मनाइएको छ ।
धरान नगर सहकारी समन्वय समितिको कार्यालय स्थापन गर्ने विषयमा केन्द्रित रहेर नगरस्तरीय सहकारी भेला समेत एकैपटक सम्पन्न भएको छ । धरान नगर सहकारी समन्वय समिति र जिल्ला सहकारी संस्था लि. सुनसरीको संयुक्त आयोजनामा भएको कार्यक्रमबाट आउँदो साउनबाट धरान–९ मा समन्वय समितिको कार्यालय स्थापना गर्ने सहमति जुटेको छ ।
कोष नभएकाले कार्यालय सञ्चालनका लागि जिल्ला सहकारी संघ सुनसरीका अध्यक्ष तथा वडा नं. १५ का अध्यक्ष नरेश इवारमले एक वर्षका लागि मासिक १ हजारको दरले सहयोग गर्ने प्रतिबद्धता जनाए । यस्तै, जिल्ला सहकारी संघका १५ जना सदस्य तथा समन्वय समितिका २१ जना सदस्यले मासिक ५ सय, प्रारम्भिक सहकारी संस्थाले मासिक ३ सयको दरले सहयोग गर्ने सहमति जुटेको छ ।
कार्यक्रमका प्रमुख अतिथी इवारमले कोरोना संक्रमितको संख्या दिनानुदिन बढ्दै गएपनि लकडाउनको स्थिति केही खुकुलो हुँदै गएकोमा सुरक्षाको मापदण्ड अपनाएर कार्यक्रम गरिएको बताए । अन्तर्राष्ट्रिय सिद्धान्तअनुसार अन्य राष्ट्रहरू सँगै नेपालमा समेत त्यही सिद्धान्तमा रहेर सहकारीहरू सञ्चालन हुने गरेको छ ।
सहकारी एन २०७४ अनुसार व्यवस्थितरूपमा चलेको सहकारीलाई लकडाउनले पनि कुनै समस्या नदिएको बताउँदै उनले सबै सहकारीलाई ऐनअनुसार चल्नका लागि आग्रह गरेका छन् । तर लकडाउनका कारण धरानको अधिकांश सहकारीमा समस्या देखिएकोले यस्तो बेला एउटा सहकारीले अर्को सहकारीलाई साथ सहयोग गरी एक हुनका लागि समेत उनले आग्रह गरेका थिए ।
कार्यक्रममा नै धरानको फुडबैंकमा सहयोग गरेका ५५ वटा सहकारीलाई प्रशंसापत्र समेत वितरण गरिएको छ । कोभिड १९ को कारण समस्यामा परेको परिवारलाई राहत प्रदान गर्न स्थापना भएको फुड बैंकमा ५ लाख १८ हजार बराबरको खाद्यान्न प्रदान गरिएको थियो । धरानका सहकारी मध्यै पवित्र साकोसले सबैभन्दा बढी ६२ हजार नगद दिएका थिए । यस्तै, सुम्निमा साकोसले २५ हजार र उधमशिल साकोसले १५ हजार १ सय नगद प्रदान गरेको थियो ।
नगर सहकारी समन्वय समितिले समय समयमा सहकारी सम्बन्धी विभिन्न तालिम, सहकारी शिक्षा तथा सहकारीको समस्याको समेत सुनुवाइ गर्ने गरेको समन्वय समितिका संयोजक मिसन लामाले बताइन् ।
यो कार्यलाई निरन्तरता समेत दिइने उनले बताइन् । कार्यक्रममा जिल्ला सहकारी संघ सुनसरीका उपाध्यक्ष दिनेश श्रेष्ठ, महिला उपाध्यक्ष शारदा मगर, जिल्ला बचत तथा ऋण सहकारी संघका अध्यक्ष शिवराज श्रेष्ठ लगायतको उपस्थिति रहेको थियो । कार्यक्रमलाई समन्वय समितिका सचिव ज्ञानेन्द्र बस्नेतले सहजीकरण गरेका थिए ।