धरानः धरानको तीनकुनेमा बिष्फोटक पदार्थसहित तीनजना पक्राउ परेका छन् ।
प्रहरीले धरान–स्थित तीनकुने चेकपोस्टमा चेकजाँचका क्रममा मिनी ट्रकबाट विस्फोटक पदार्थ बनाउन प्रयोग हुने ४७ किलो पदार्थ बरामद भएको छ ।
सो पदार्थ परीक्षण गर्दा बारुद (बन्दुकको धुलो/कालो धुलो) बनाउन प्रयोग हुने सामग्री भएको पुष्टि भएको इलाका प्रहरी कार्यालय धरानका डिएसपी भीषणबाबु राईले जानकारी दिए ।
गत कार्तिक १० गते इटहरीबाट धरानतर्फ आउँदै गरेको को२ख १६१८ नम्बरको मिनी ट्रकलाई चेकपोस्टमा प्रहरीले चेकजाँच गरेको थियो । सो क्रममा भन्सार छली ल्याइएका विभिन्न सामानसँगै बोराभित्र प्याकिङ गरी राखिएको पारदर्शी सेतो ठोस पदार्थ ४७ किलो फेला परेको थियो ।
प्रहरीले सो सामान नियन्त्रणमा लिन खोज्दा मिनी ट्रकमा सवार व्यक्तिहरूले प्रहरी कर्मचारीमाथि अभद्र व्यवहार गरेको जनाइएको छ । उनीहरूले प्रहरीले सोधपुछ गर्ने क्रममा उनीहरूले प्रहरीलाई गालीगलौज गर्नुका साथै हातपातको प्रयास गरेको प्रहरीको भनाइ छ । उनीहरूले स्थानीय महिला तथा बालबालिकासमेत त्रसित हुने गरी अभद्र व्यवहार गरेको प्रहरीले जनाएको छ ।
घटनामा संलग्न भएको आरोपमा मोरङका तीन जनालाई नियन्त्रणमा लिइएको छ ।
पक्राउ पर्नेमा विराटनगर महानगरपालिका–४ छिटाहाका २५ वर्षीय प्रदीपकुमार साह तथा जहदा गाउँपालिका–१ का ४२ वर्षीय भुपेन्द्र राजवंशी र ४२ वर्षीय कार्तिक राजवंशी रहेका छन् ।
बरामद पदार्थ परीक्षणका लागि नेपाल प्रहरी केन्द्रीय विधिविज्ञान प्रयोगशाला, सामाखुसी काठमाडौं पठाइएको थियो । प्रयोगशालाको परीक्षण प्रतिवेदनमा उक्त पदार्थलाई ‘कम्पोनेन्ट अफ लो एक्स्प्लोसिभ (बन्दुकको धुलो/कालो धुलो) अर्थात् कम शक्तिको विस्फोटक पदार्थ बनाउन प्रयोग हुने सामग्री भएको उल्लेख गरिएको प्रहरीले जनाएको छ ।  प्रयोगशालाको परीक्षण प्रतिवेदनमा नमुना (एक्जिबिट–१) मा पोटासियम आयन र नाइट्रेट आयन फेला परेको उल्लेख छ ।
यसअघि अभद्र व्यवहारसम्बन्धी कसुरमा अनुसन्धान भइरहेकोमा प्रयोगशालाको प्रतिवेदनपछि पक्राउ परेका तीनै जनामाथि विस्फोटक पदार्थसम्बन्धी कसुरमा समेत थप अनुसन्धान अघि बढाइएको प्रहरीले जनाएको छ ।