धरानः धरान उपमहमानगरपालिका–३ पुरानो बजारस्थित धरानको पालिका तरकारी बजारमा आगलागी हुँदा करिब २० पसल जलेर नष्ट भएका छन् भने लाखौंको क्षति भएको छ ।
करिब ५ बजेदेखि लागेको आगोलाई धरान उपमहानगरपालिकाको दमकल र स्थानीयबासीले नियन्त्रणमा लिएका थिए । आगलागीबाट करिब २० वटा पसल जल्दा झण्डै ५० लाख रूपैयाँ बढी क्षति अनुमान गरिएको छ ।
आगलागीबाट स्थानीय रमा चौहान खतिवडा, कल्पना तामाङको होटेल तथा फलफूल पसल, ज्ञानकुमारी श्रेष्ठको फलफूल तथा किराना पसल, अनिता आचार्जु, वसिम श्रेष्ठ, सविना वेघा खनाल,प्रविना लिम्बू, इन्दिरा श्रेष्ठ, मिरा निरौला, सुरेन्द्र चौधरी, लालबहादुर राई र यामकुमार विकको टिनको छानोलगायतका पसल जलेर नष्ट भएको छ ।
चौहानको पसलमा विद्युत सर्ट हुँदा आगलागी शुरू भएको स्थानीय भक्तबहादुर कटुवाल बताउँछन् । बजार क्षेत्रका सबै पसलेहरु करिब ९ बजे पसल बन्द गरी घर गएको र बिहान पसल खोल्न आइनपुग्दै आगाले सबैको पसल खरानी पारेको स्थानीयहरुले बताएका छन् ।
फोटोः मिङमा भोटे