धरानः केही युवा यस्ता छन्, जसले हङकङ बसेर धरानलाई सहयोग गर्दै आएका छन् ।
हङकङमा बस्ने धरानेले मासिकरूपमा सहयोग गर्दै आएको युवाले बताएका छन् । ‘हङकङ नेप्लिज योथ’ नामक संस्थामार्फत् उनीहरूले धरानेलाई सहयोग गरेका हुन् । गरिब, असहाय, अपाङ्ग आदिलाई यस्तो सेवा गर्दै आएको उनीहरूको भनाइ छ ।
उनीहरूले यसपटकको महिनामा धरानस्थित अपाङ्ग पुनस्थापना केन्द्रलाई सहयोग गरेका छन् । चामल, दाल, नुन, तेललगायतका करिब २५ हजार रूपैयाँको सामग्री प्रदान गरिएको संस्थाका कमानसिंह याम्फुले जानकारी दिए । केन्द्रका अध्यक्ष भीम राईलाई सो सामग्री हस्तान्तरण गरिएको थियो ।
विशेषतः मासिकरूपमा कसै न कसैलाई सहयोग गर्दै आएको याम्फुले बताए । ‘हङकङमा बस्ने साथीभाइहरू हुनुहुन्छ, उहाँहरूले नै सहयोग गर्दै आउनुभएको छ’, उनले थपे, ‘महिनामा एकपल्ट अपाङ्ग, अनाथलगायत गरिब, दुःखीलाई सहयोग गर्दै आएका छौं ।’ उनले यसअघि धरानमै पनि धेरै सहयोग गरिसकेको र बारामा हावाहुरीपीडितलाई पनि सहयोग गरिसकेको बताए ।
फोटोः हाम्रो कोशी आवाज